Tags-Hichki

āḳhrī hichkī tire zaanū pe aa.e
maut bhī maiñ shā.irāna chāhtā huuñ

nasīm-e-sub.h gulshan meñ guloñ se kheltī hogī
kisī kī āḳhirī hichkī kisī kī dil-lagī hogī

jo hichkī aa.ī to ḳhush maiñ huā ki maut aa.ī
kisī ko yaar kā itnā bhī intizār na ho

use yaad thī kal kī tārīḳh shāyad
sisaktī rahī le ke hichkī udāsī

kuchh der ko nabz-e-ālam bhī chalte chalte ruk jaatī hai
har mulk kā parcham girtā hai har qaum ko hichkī aatī hai

rote rote bañdh ga.ī hichkī 'hafīz'
jab kahā kuchh mājrā-e-dard-e-dil

hichkī thamtī hī nahīñ 'nāsir'
aaj kisī ne yaad kiyā hai

shāyad mire sanam ne kiyā yaad mujh ko aaj
hichkī tabhī hai aa.ī nivāloñ ke darmiyāñ

kar diyā tere taġhāful ne adhūrā mujh ko
ek hichkī agar aa jaa.e to puurā ho jā.ūñ

ka.ī din se koī hichkī nahīñ hai
vo ham ko yaad ab kartī nahīñ hai

āḳhirī hichkī pe hai nashshe kī sāġhar jaagā
pyaas ko niiñd jab aa.ī to samundar jaagā

mirī be-sāḳhta hichkī mujhe khul kar batātī hai
tire apnoñ ko gaañv meñ to akasr yaad aatā hai

ḳhabar detī hai yaad kartā hai koī
jo bāñdhā hai hichkī ne taar aate aate

naza.a ke dam bhī unheñ hichkī na aa.egī kabhī
yūñhī gar bhūle raheñge vo 'saḳhī' kī yaad ko

aaj is andāz se aa.ī mujhe hichkī 'ājiz'
bhūlne vaale ne phir yaad kiyā ho jaise

mujhe kyuuñ aaj hichkī aa rahī hai
koī yaad aa.ī aur un ko jafā kyā

pasīna ashk hasrat be-qarārī āḳhirī hichkī
ikaTThā kar rahā huuñ aaj sāmān-e-safar apnā

āḳhrī hichkī se pahle chāra-gar se pūchh luuñ
jo nazar aatā nahīñ rishta kahāñ le jā.egā

rāt-bhar sub.h kī ummīd pe zinda thā marīz
sub.h hote hī use āḳhirī hichkī aa.ī

ye surḳh talve ye tanhā.ī āḳhirī hichkī
ab is se aage koī kārvāñ huā to kyā