Tags-Hunar

ik baar apnā zarf-e-nazar dekh lījiye
phir chāhe jis ke aib-o-hunar dekh lījiye

sirisht-e-gul hī meñ pinhāñ haiñ saare naqsh-o-nigār
hunar yahī to kaf-e-kūza-gar meñ hote haiñ

ā.ina-navāzī se kuchh nahīñ huā hāsil
ḳhud bane jo ā.īna ab vahī hunar māñgūñ

kyā duā-e-farsūda harf-e-be-asar māñgūñ
tishnagī meñ jiine kā ab koī hunar māñgūñ

ḳhālī safā.ī-qalb se behtar hai dāġh-e-ishq
kyā aib hai ki jis ke muqābil hunar nahīñ

mere hāthoñ meñ nahīñ koī hunar ab ke baras
jaane kis ism pe khultā hai ye dar ab ke baras

kiyā rahīn-e-hunar ham ko nā-rasā.ī ne
udaas bāñhoñ meñ shams o qamar banāte haiñ

ye salīqa tujhī se aayā hai
baat karne meñ bā-hunar Thahrī

fasīl-e-shahr ke andar the kitne ahl-e-hunar
nahīñ hai jin se shanāsā koī bhī bāhar aaj

jo chāhtā use maiñ bhī tabāh kar detā
usī ke qurb meñ aisā hunar milā thā mujhe

ḳhushbū kī tarah lafz the ma.anī ba-qaid-e-rañg
ye marhale bhī aa.e haiñ arz-e-hunar ke biich

dikhā.ūñ to hunar kaise maiñ 'kalkal'
abhī aa.ī mirī baarī nahīñ hai

aate aate ishq karne kā hunar aa jā.egā
rafta-rafta zindagī āsān hotī jā.egī

siip aur jauharī ke sab rishte
sher aur sher ke hunar meñ haiñ

aarzū ye hai ki taqdīs-e-hunar kī ḳhātir
tere hoñToñ pe rahūñ hamd-o-sanā ho jā.ūñ

zaḳhm-e-hunar ko samjhe hue hai gul-e-hunar
kis shahr-e-nā-sipās meñ paidā kiyā mujhe

āñdhiyāñ zor dikhā.eñ bhī to kyā hotā hai
gul khilāne kā hunar bād-e-sabā jāntī hai

zindagī kī thā alāmat ik hunar be-jān sā
rah gayā tasvīr koī dekh kar hairān sā

jo basīr ho vo nazar bhī de mujhe āgahī kā hunar bhī de
magar ab tū merī ḳhabar bhī de ki mujhe ḳhud apnā pata nahīñ

khul hī jaate haiñ un pe aib-o-hunar
ā.īne se jo baat karte haiñ