Tags-Hunar

are o adīb-e-fasurda-ḳhū are o muġhanni-e-rañg o bū
abhī hāshiye pe khaḌā hai tū bahut aage ahl-e-hunar ga.e

ye ahl-e-qalam ye ahl-e-hunar dekho to 'shakīl' in sab ke jigar
fāqoñ se haiñ dil murjhā.e sū-e-dār kī bāteñ karte haiñ

ahl-e-hunar kī āñkhoñ meñ kyuuñ chubhtā rahtā huuñ
maiñ to apnī be-hunarī par naaz nahīñ kartā

atā huī hai mujhe din ke saath shab bhī magar
charāg shab meñ jilā detā hai hunar merā

duniyā to ye kahtī hai bahut mujh meñ hunar hai
maiñ chāhūñ to duniyā ko chaman-zār banā duuñ

duniyā to ye kahtī hai bahut mujh meñ hunar hai
maiñ chāhūñ to duniyā ko chaman-zār banā duuñ

ye iz.hār-e-sāda hai jazbāt kā
kamāl-e-hunar kī numā.ish nahīñ

kartī hai sahar zard gulāboñ kī tijārat
meyār-e-hunar zaḳhm ko bharne nahīñ detā

daaġh husn-e-qamar bhī hotā hai
aib rashk-e-hunar bhī hotā hai

sadma-e-hijr se mahfūz rakhūñgā tujh ko
mujh ko qistoñ meñ bichhaḌne kā hunar aatā hai

shā.irī jis ne chhuḌā.e the jahāñ ke kārobār
ab takalluf bartaraf is meñ hunar baaqī nahīñ

tesha-ba-kaf ko ā.ina-gar kah diyā gayā
jo aib thā use bhī hunar kah diyā gayā

sabhī zindagī ke maze lūTte haiñ
na aayā hameñ ye hunar zindagī bhar

chashm-e-nam kuchh bhī nahīñ aur sher-e-tar kuchh bhī nahīñ
ab yahāñ ḳhūn-e-jigar naqsh-e-hunar kuchh bhī nahīñ

jis hunar ko log samjheñge kabhī la.al-o-gohar
aaj ke bāzār meñ aisā hunar kuchh bhī nahīñ

vaqt lafzoñ se banā.ī huī chādar jaisā
oḌh letā huuñ to sab ḳhvāb hunar lagtā hai

kyuuñ na aa jaa.e mahakne kā hunar lafzoñ ko
terī chiTThī jo kitāboñ meñ chhupā rakkhī hai

ham apne jism-o-jāñ ko ḳhizāñ meñ utaar kar
gulnār mausamoñ ke hunar dekhte rahe

nā-qadrī-e-hunar kī mujhe taab hī na thī
maiñ ne ḳhud apnī jins uThā lī dukān se

matā-e-be-bahā hai dard-o-soz-e-ārzūmandī
maqām-e-bandagī de kar na luuñ shān-e-ḳhudāvandī