Tags-Hunar

uchhālā karte haiñ aksar 'vaqār' auroñ ke aiboñ ko
vo jin ko parda-poshī kā hunar achchhā nahīñ lagtā

use ajab thā ġhurūr-e-shaguft-e-ruḳhsārī
bahār-e-gul ko bahut be-hunar kahā us ne

ġhamoñ kī dhuup meñ lab par tabassum
ye jiine kā hunar dekhā to jaa.e

rafūgarān-e-hunar 'nāz' be-namak the magar
phir apne zaḳhm ko shādāb dekhtā huuñ maiñ

ḳhālī jholī liye phirtā hai jo aivānoñ meñ
merā shaffāf hunar arz-e-hunar ko tarse

koī āsūda nahīñ ahl-e-siyāsat ke sivā
ye sadī dushman-e-arbāb-e-hunar lagtī hai

shauq se aa.e burā vaqt agar aatā hai
ham ko har haal meñ jiine kā hunar aatā hai

aaj kā din ye ilm-o-hunar kā fikr-o-amal kī fat.h-o-zafar kā
aaj shikast-e-zulmat-e-shab hai aaj faroġh-e-nūr kā din hai

shāḳh hunar se toḌ ke sher kā phuul maiñ us ko de duuñ
us kī zulf ko hai ma.alūm gulāb ko taaza rakhnā

āsmāñ kā shikva kyā vaqt kī shikāyat kyuuñ
ḳhūn-e-dil se nikhrā hai aur bhī hunar merā

gañvā dī umr use nazm kar nahīñ paayā
salīqe aate haiñ vaise to har hunar ke mujhe

kyuuñ ahl-e-junūñ arbāb-e-ḳhirad kī mahfil meñ ḳhāmosh raheñ
vo apne hunar kī baat kareñ tum apne hunar kī baat karo

dil ashk ashk dimāġh aag aag hai 'mahshar'
ye intiqām bhī mujh se mire hunar ne liyā

shart salīqa hai har ik amar meñ
aib bhī karne ko hunar chāhiye

ye kis muhim par chale the ham jis meñ rāste pur-ḳhatar na aa.e
hameñ navāzā na vahshatoñ ne hameñ junūñ ke hunar na aa.e

sūkhī shāḳhoñ pe na.e barg-o-samar bāñdhte haiñ
qāfiya jab bhī nayā ahl-e-hunar bāñdhte haiñ

log is Dhab se qasīde meñ utar bāñdhte haiñ
sāhab-e-sadr ke aiboñ ko hunar bāñdhte haiñ

terī zamīñ nasīb ne tere hunar ko sauñp dī
ḳhvāh chaman banā use ḳhvāh tū regzār kar

bām-e-ummīd se palTī huī nākām duā
bāryābī kā koī aur hunar māñge hai

jahān-e-fikr pe chamkegā jab sitāra mirā
hunar zamāne pe tab hogā āshkārā mirā