Tags-Husn

sitāroñ kī tarah alfāz kī zau baḌhtī jaatī hai
ġhazal meñ husn us chehre kī tābānī se aayā hai

vo husn ko jalva-gar kareñge
ārā.ish-e-bām-o-dar kareñge

zarā hazrat-e-dil kī jur.at to dekho
ye nazzāra-e-husn-e-jāñ kareñge

but banā baiThā rahā 'hasrat' huzūr-e-husn meñ
kah ga.e apnī zabāñ meñ ashk tharrā.e hue

din agar chaḌhtā udhar se maiñ idhar se jāgtā
husn saarā mashriqoñ kā saath mere jāgtā

merī ghuTTī meñ paḌī thī ho ke hal urdu zabāñ
jo bhī maiñ kahtā gayā husn-e-bayāñ bantā gayā

jalva-e-husn numāyāñ hai har ik zarre se
kyā kiyā jaa.e agar zauq-e-nazar aam na ho

'asġhar' ġhazal meñ chāhiye vo mauj-e-zindagī
jo husn hai butoñ meñ jo mastī sharāb meñ

maiñ kis tarah se pareshān-hāl unheñ samjhūñ
vo apne husn-e-amal se to mālā-māl mile

apne hī zauq-e-jamāl-o-husn ke hāthoñ 'shamīm'
aaj ham badnām āvāra haiñ saare shahr meñ

husn vāloñ ke sitam sah kar bhī ham zinda rahe
varna kitnoñ ke hue haiñ vaare nyāre shahr meñ

kyā yūñhī jāzib-o-dildār haiñ terī āñkheñ
ḳhāliq-e-husn kā shahkār haiñ terī āñkheñ

aap ke husn-e-fusūñ-sāz ke kyā kahne haiñ
aa.ina dekh ke hairat meñ giraftār huā

mahv-e-ishq-e-shah-e-ḳhādim huuñ maiñ 'āsim' yaksar
husn par jis ke haiñ ye mere dil-o-jāñ nāzāñ

bichhaḌ ke tum se ḳhizāñ ho ga.e to ye jaanā
hamāre husn meñ sab dilkashī tumhārī thī

kabhī to rañg-e-husn-e-yār dekhūñ
kahāñ tak dīda-e-ḳhūñ-bār dekhūñ

kahīñ husn vāloñ ke darmiyāñ ye ġhazal sunī to kahā ki haañ
ye hai nazm-e-'sāqib'-e-ḳhush-bayāñ ye usī kā tarz-e-kalām hai

lākhoñ hijāb husn ko ghere raheñ magar
Thahre haiñ kab nigāh-e-mohabbat ke sāmne

ai husn-e-be-misāl majāl aa.ine kī kyā
jo aa sake kabhī tirī sūrat ke sāmne

le uḌe ahl-e-junūñ husn kī ik ek adā
ḳhalvat o bazm meñ ab farq hī kyā rakkhā hai