Tags-Husn

zulf-e-ḳhamdār meñ nūr-e-ruḳh-e-zebā dekho
chashm-e-baddūr mirā husn-e-tamannā dekho

husn ik dilrubā hukūmat hai
ishq ik qudratī ġhulāmī hai

do zakāt-e-husn kuchh darvesh ko
haiñ baḌe rutbe saḳhī ke vāste

dar-ba-dar kūchoñ meñ ham bhī phir chuke
ek husn-e-ḳhān.gī ke vāste

husn aur ishq donoñ meñ tafrīq hai par inhīñ donoñ pe merā īmān hai
gar ḳhudā ruuTh jaa.e to sajde karūñ aur sanam ruuTh jaa.e to maiñ kyā karūñ

saaya sā husn ke ham-rāh hai ishq-e-bebāk
saath ye jins-e-ḳharīdār liye phirtī hai

tujhe qarīb se dekhā to dil ne sochā hai
ki terā husn bhī ik zāviya nigāh kā thā

dil se apne pūchh o zindāni-e-ilm-e-kitāb
husn-e-qudarat ko bhī dekhā hai bar-afganda-naqāb

husn hī husn hai gulzār-e-junūñ meñ raqsāñ
ishq kā ālam-e-sad-rañg javāñ hai ki nahīñ

ye husn-e-abr-e-ravāñ shola-hā-e-lāla-o-gul
tire jamāl kī ra.anā.iyoñ ke saa.e haiñ

husn-e-shab sub.h-dam Dhalā lekin
peshtar us ke chāñdnī sī rahī

kahīñ dām-e-sabza-e-gul milā kahīñ aarzū kā chaman khilā
tire husn ko ye ḳhabar bhī hai maiñ kahāñ kahāñ se guzar gayā

ġham-e-hayāt bhī āġhosh-e-husn-e-yār meñ hai
ye vo ḳhizāñ hai jo Duubī huī bahār meñ hai

ai fitrat-e-sad ma.anī 'ġhālib' kī ġhazal hai tū
jab husn tirā parkhā pahle se savā niklā

maiñ us kā said-e-husn vo merā shikār-e-ishq
us kī nigāh mujh pe vo merī nigāh meñ

aatī hai kis dimāġh se ik ik nigāh-e-husn
dil meñ hazār fitna-e-barpā liye hue

daulat-e-husn-e-lā-zavāl hai tū
daulat-e-ishq-e-lā-zavāl haiñ ham

husn andāz adā naaz nigāheñ shoḳhī
dil mirā chhīn ke ban baiThe haiñ muḳhtār tamām

ik jhalak dekh lī parde se to zālim ne kahā
luuT lī tū ne mire husn kī sarkār tamām

haram-o-dair se alag ham ne
abhī ik sajda sar meñ rakkhā hai