Tags-Husn

likhā kis husn se ḳhat meñ ki ham tujh se kashīda haiñ
kashish harfoñ kī aisī hai ki ham bhī saad karte haiñ

chashm-e-mushtāq za-sar tā-ba-qadam maiñ bhī huuñ
ban gayā hai jo tirā husn sarāpā chehra

chehra-e-husn ko ab dekh ke ye sochtā huuñ
aa.ina hai koī yā ā.ina-ḳhāna chehra

vo husn-o-ishq ke qisse haiñ jin se vābasta
unhī kā zikr mirī dāstāñ ke saath chale

huī sham-e-husn raushan to maiñ ban gayā patañgā
tirī bandagī thī suunī mirī zindagī se pahle

tauhīn-e-mohabbat haiñ mohabbat meñ ye shikve
lagtā hai abhī husn-e-talab-ḳhām bahut hai

husn kī gahrā.iyāñ tasvīr-dar-tasvīr thiiñ
aa.ina ham aa.ine ke rū-ba-rū karte rahe

husn maġhrūr hai magar tauba
ishq agar be-niyāz ho jaa.e

dhyān meñ us ke do-ālam se khiñchā baiThā huuñ maiñ
ya.anī ik naqsha khiñchā hai jazb-e-husn-e-yār kā

hazāroñ husn vaale is zamīñ meñ dafn haiñ 'muztar'
qayāmat hogī jab ye sab ke sab madfan se nikleñge

kyā isī kār-e-nazar-bandī ko
husn kī jalvagarī kahte haiñ

ik haqīqat sahī firdaus meñ hūroñ kā vajūd
husn-e-insāñ se nimaT luuñ to vahāñ tak dekhūñ

sirf is shauq meñ pūchhī haiñ hazāroñ bāteñ
maiñ tirā husn tire husn-e-bayāñ tak dekhūñ

tujhe kho kar bhī tujhe pā.ūñ jahāñ tak dekhūñ
husn-e-yazdāñ se tujhe husn-e-butāñ tak dekhūñ

ye hamd husn-e-bayāñ hai mirā ki ijz-e-suḳhan
har ek vasf jab us kā bayāñ se pahle thā

husn kī ek ek baat fusūñ
ishq kā har fusūñ hai be-ma.anī

ishq-e-nākām-e-husn kā qissa
kyā kahūñ kyā sunūñ hai be-ma.anī

husn-e-mutlaq kā nishāñ ka.abe meñ to miltā nahīñ
ehtiyāt aao chal kar dekh leñ but-ḳhāna ham

vo āftāb-e-husn hai jalve luTā.e jā.egā
us ko ab is se kyā ġharaz mushtāq kitnā kaun hai

vo apne husn kā har raaz kholne ke liye
qabā banāte haiñ band-e-qabā banāte haiñ