Tags-Husn

jab se aayā hai nazar ye tirā husn-e-be-dāġh
kabk ko maah na bulbul ko chaman yaad aayā

husn-e-fitrat kī aabrū mujh se
aab o gil meñ hai rañg-o-bū mujh se

tum husn kī ḳhud ik duniyā ho shāyad ye tumheñ mālūm nahīñ
mahfil meñ tumhāre aane se har chiiz pe nuur aa jaatā hai

maiñ nīm-shab āsmāñ kī vus.at ko dekhtā thā
zamīñ pe vo husn-zār utrā to maiñ ne dekhā

haa.e kis sādgī se sīkhā hai
husn ne ehtimām-e-rānā.ī

arsa huā vo fitnagar aayā nahīñ kabhī idhar
suunī paḌī hai rah-guzar husn-e-ḳhirām ke baġhair

junūñ meñ bhī 'muzaffar' hai hameñ pās-e-adab har-dam
ba-qadr-e-zarf mahv-e-husn-e-jānāñ hote jaate haiñ

be-chehra log husn kā me.aar ban ga.e
parchhā.iyoñ ko nuur kā paikar kahā gayā

kuchh na kuchh husn bhī to hai mujrim
sab kā sab aañkh kā gunāh nahīñ

chāhat meñ apnā zauq-e-safar bhī ajiib thā
us se hī shauq-e-husn-e-'masarrat' sajā rahā

ḳhud-bīñ na ban baġhaur zarā aa.ina to dekh
maiñ bhī to tere husn kī ra.anā.iyoñ meñ huuñ

apne in.ām-e-husn ke badle
ham tahī-dāmanoñ se kyā lenā

dast-e-ḳhirad se parda-kushā.ī na ho sakī
husn-e-azal kī jalva-numā.ī na ho sakī

dekhī nigāh-e-shauq meñ jab ġham kī dāstāñ
andāz-e-husn aur nikhartā chalā gayā

jo dard uThe bhī to iz.hār us kā ho kyūñkar
huzūr-e-husn agar āvāz baiTh hī jaa.e

ye husn-o-rañg kā tūfāñ hai ma.āz-allāh
nigāh jam na sake aur thak ke rah ga.e

rāz-āshnā hai merī nazar yā phir aa.ina
varna vo apne husn ke ḳhud rāz-dāñ na the

khelī thī kabhī husn se tere nigah-e-shauq
itnā hai tujhe yaad yahī baat baḌī hai

har ġhunche ke chehre se ubharte haiñ tire naqsh
har gul meñ tire husn kī tasvīr juḌī hai

bayān husn kare terā 'bahr' kis muñh se
tirā banāv tire chhab tirī phaban kyā ḳhuub