Tags-Husn

ne ġhurfe se jhāñkā na kabhī baam par aa.e
pinhāñ rahe tum husn-e-dil-ārā ke dinoñ meñ

dam-ba-ḳhud us husn ko hī dekhte rahte the ham
yuuñ barat TuuTā ki hairānī se bāhar aa ga.e

jab taḳhayyul isti.āroñ meñ Dhalā to shahr meñ
der tak husn-e-bayāñ ke tazkire hote rahe

sun ke ġhazloñ ko mirī jhuum uThe har koī
mire ash.ār ko vo husn-o-ma.ānī de de

nasha-e-husn-e-haqīqī se the madhosh-e-azal
bāda-e-nāb se sarshār gurū-nānak the

kabhī na hoñge murīd-e-jiddat nahīñ haiñ mushtāq-e-husn-e-bid.at
hamārā mashrab hai sūfiyāna hamārā maz.hab sanātanī hai

ba-rañg-e-husn-e-butāñ hai dil-e-shagufta mirā
jo is chaman meñ ḳhizāñ ho to phir bahār na ho

husn tire huzūr ḳhud aa.e ba-iztirāb-e-dil
ai dil-e-dard-āshnā aisī bhī ek aah kar

ai dil-e-dard-āshnā husn se rasm-o-rāh kar
ishq hai bā.is-e-najāt shauq se to gunāh kar

apnī pathrā ga.ī haiñ āñkheñ bhī
husn parda uThā.egā kab tak

kisī din to vo bahr-e-husn aa kar zeb-bar hotā
ki āġhosh-e-tamannā shakl-e-sāhil ham bhī rakhte the

husn ai jaan nahīñ rahne kā
phir ye ehsān nahīñ rahne kā

ai mire husn-e-gurezāñ kab tak
tū mirī qadr na pahchānegā

ishq vahshī hai jahāñ dekhegā
husn ko siine se lipTā legā

tālib-e-āzār ishq aur husn āsā.ish-pasand
tū bhī ho merā sharīk-e-mudda.ā mumkin nahīñ

husn fankār kī ik chheḌ hai ishq-e-nādāñ
bevafā.ī ke is ilzām meñ kyā rakkhā hai

maan lo kaise ki maiñ aib sarāpā huuñ faqat
mere ahbāb kā ye husn-e-nazar lagtā hai

maiñ ne jab ġhaur se dekhā to vo patthar niklā
varna vo husn nazar aatā thā insāñ kī tarah

tū mirī zaat mirī ruuh mirā husn-e-kalām
dekh ab to na badal gardish-e-daurāñ kī tarah

tumhāre husn ko merī nazar lagī hai zarūr
kahāñ ho pahle se tabdīl ho ga.e ho tum