Tags-Husn

ye sho.ala-e-be-mehr to bas aañch hī degā
haañ aur tire husn se kyā pā.eñge ham log

ye sānehe dil-e-ġham-ghīñ huā hī karte haiñ
na ishq hī kī ḳhatā hai na husn hī kā qusūr

husn-e-be-pardā kī yalġhār liye baiThe haiñ
tirchhī nazroñ ke kaḌe vaar liye baiThe haiñ

vo dil se tañg aa ke aaj mahfil meñ husn kī tamkanat kī ḳhātir
nazar bachānā bhī chāhte haiñ nazar milānā bhī chāhte haiñ

shikva-e-husn ye hai jab kabhī tum jā nikalte ho
to but-ḳhāne se yā-allāh kī āvāz aatī hai

ḳhat kī syāhī ne aa gherī sabāhat-e-husn
is rome se hai mushkil ye fauj-e-zañg haTnī

vo ḳhudā-e-husn hī kyuuñ na ho koī shai hai ġhairat-e-ishq bhī
jo tirī sadā pe khule na dar vo khule bhī jab to sadā na de

husn dekhā hai magar hind kī tasvīreñ kā
lailā bāzār meñ shakl apnī jo badlātī hai

na milā kar udaas logoñ se
husn terā bikhar na jaa.e kahīñ

lafz-e-kun se kahīñ taḳhlīq-e-do-ālam hotī
husn-e-andāz thā ye aap ke farmāne kā

adā-e-husn-e-dil-kash ko zarā samjhe to ye duniyā
tavajjoh is meñ pinhāñ hai ye un kī be-ruḳhī kyoñ ho

gul-ruḳhāñ kā āb-o-rañg dekhne se mere hai
husn kī gulistāñ kī mujh ko bāġhbānī hai

ik ye vafā ki nañg-e-ġham-e-dost hai hunūz
ik vo sitam ki husn kā ā.īna-dār hai

hogī kisī ko fursat-e-nazzāra-e-jamāl
'fānī' ḳharāb-e-husn tamāshā-e-yār hai

tamīz-e-husn-o-ishq na irfān-e-ġham magar
ik tīr-e-be-panāh kaleje ke paar hai

vo gul-badan hai sarāpā gulāb jaisā hai
jahān-e-husn meñ vo āftāb jaisā hai

husn kī ḳhalvat meñ darrātā huā
ishq kī dekho majāl aa hī gayā

asr-e-hāzir meñ koī chiiz bhī anmol nahīñ
ishq kī aan bike husn kā pindār bike

na dekhnā kabhī ā.īna bhuul kar dekho
tumhāre husn kā paidā javāb kar degā

sho.ale sā rañg kyā hai vo husn-e-karishma-sāz
haiñ kashmakash meñ dekhne vaale paḌe hue