Tags-Husn

jannat-e-husn meñ kiyā haq ne
hauz-e-kausar maqām tujh lab kā

husn ke ḳhizr ne kiyā labrez
āb-e-haivāñ suuñ jaam tujh lab kā

kis tarah husn-e-zabāñ kī ho taraqqī 'vahshat'
maiñ agar ḳhidmat-e-urdu-e-muallā na karūñ

vahdat-e-sūrat-o-ma.anī ko samajh ai vaa.iz
husn-e-yazdāñ kā tasavvur ruḳh-e-ādam se milā

tujh pe khul jaa.e ki kyā mehr ko shabnam se milā
aañkh ai husn-e-jahāñ-tāb zarā ham se milā

us ke do husn haiñ kārīgarī-e-ḳhāk se ek
aur ik vo jise ījād kiyā hai maiñ ne

ishq kī daulat-e-bedār 'salīm'
husn par husn-e-gumāñ se aa.ī

chain se mujh ko tirā husn na jiine degā
dil kī bastī hai ki har roz luTā kartī hai

jitne husn-ābād meñ pahoñche hosh-o-ḳhirad kho kar pahoñche
maal bhī to utne kā nahīñ ab jitnā kuchh mahsūl paḌā

naġhma-ārā vādiyoñ meñ haiñ nujūm-o-mehr-o-māh
husn kī chhā.ī huī barnā.iyāñ dehlī meñ haiñ

mai-kashoñ ko nashsha ho jaatā hai be-jām-o-subū
husn kī vo dil-fareb añgḌā.iyāñ dehlī meñ haiñ

ḳhuld kī hūreñ bhī sharmātī haiñ jin ke husn se
āj-kal un mah-vashoñ ke kārvāñ dehlī meñ haiñ

lubhātā hai agarche husn-e-dariyā Dar rahā huuñ maiñ
sabab ye hai ki ik muddat kināre par rahā huuñ maiñ

bhulā de arsh kī jannat kā ḳhvāb āñkhoñ ko
bahār-e-husn se yuuñ mālā-māl thā koī

chashm-e-adā-shanās ko hairān kar diyā
husn apnā zarre zarre meñ dikhlā ke yaar ne

maiñ ishq huuñ aur merā nahīñ koī Thikāna
ai husn mujhe dīda-e-hairān meñ rakhnā

merī ik baat pe kiiñ us ne hazāroñ bāteñ
husn-e-maqsūd magar us ke javāboñ meñ nahīñ

niiñd us ke husn-e-ruḳh ke tasavvur meñ aa.ī thī
dekhā hai barq-e-tūr kā manzar tamām raat

koī nahīñ jo tere aage husn kā paikar ban kar aa.e
shardhā kī kaliyāñ muskā.eñ qudrat kī sauġhātoñ meñ

husn masrūf-e-parda-dārī hai
jaane ab kis nazar kī baarī hai