Tags-Husn

zindagī baiThī thī apne husn par bhūlī huī
maut ne aate hī saarā rañg phīkā kar diyā

is ko namrūd kā taqāzā jaan
ātish-e-husn ko na baiTh ke taap

chhā ga.iiñ tārīkiyāñ kho gayā husn-e-nazar
va.ada-e-dīdār-e-ām dekhiye kab tak rahe

utar jā.egā tū o āftāb-e-husn koThe se
giregā sāya-e-dīvār ham par āsmāñ ho kar

pahrā diyā hai daulat-e-bedār-e-husn kā
so.e jo vo baġhal meñ to jaagā mirā nasīb

us kī shoḳhī kā hai ta.ajjub kyā
husn ye kuchh aur us pe ain shabāb

sho.ala-e-husn terā kyā kahnā
phūñk de us ke parda-hā-e-hijāb

taġhayyurāt ke aalam meñ zindagānī hai
shabāb faanī nazar faanī husn faanī hai

husn kyā hai ik ġhazal hai 'ashk' ik taaza ġhazal
jaam hai miinā hai vo sāġhar hai vo sahbā hai vo

husn aur us pe husn-e-zan rah ga.ī bul-havas kī sharm
apne pe e'timād hai ġhair ko āzmā.e kyuuñ

kahāñ kahāñ na huiiñ sabt husn kī mohreñ
kalī havā meñ bikhar kar bhī rā.egāñ na ga.ī

talāsh-e-husn kahāñ le chalī ḳhudā jaane
umañg thī ki faqat zindagī ko apnā.eñ

vo gore gore chehroñ pe zulfeñ idhar udhar
aḳhtar se vo chamakte hue kaan ke guhar

kis kis kā e'timād-e-vafā ho gayā shikast
kis kis ko husn se hai gilā dekhte chalo

manzar-e-husn-e-do-ālam ke nisār
mujh ko ā.īna dikhātā hai koī

pahle hī din khulā ye javāb-o-savāl meñ
kuchh husn us ke dil meñ hai kuchh ḳhadd-o-ḳhāl meñ

jab hijāboñ meñ pinhāñ thā husn-e-butāñ but-parastī kā bhī ek meyār thā
ab to har moḌ par but hī but jalvagar ab kahāñ tak butoñ ko ḳhudā māniye

ishq ko kab yaad thī rasm-e-vafā
husn kā kis muñh se shikvā kījiye

ḳhudā-e-ishq hai vo husn-e-kāfir
magar ab tak na samjhā ishq kyā hai

bahār-e-husn vo aa.e nazar jo us kī 'nazīr'
to dil vahīñ chaman-e-ishq meñ nihāl huā