Tags-Ibaadat

har ibādat-gāh se ūñchī haiñ mil kī chimniyāñ
shahr meñ har shaḳhs kā īmān aadhā rah gayā

isī se terī ibādat pe rañg aa.egā
jabīñ jhukānā huā un ke āstāñ se guzar

jise maiñ chhū nahīñ saktā dikhā.ī kyuuñ vo detā hai
farishtoñ jaisī bas merī ibādat dekhte rahnā

ba-shauq-e-sajda chale haiñ lekin ajiib maslak hai āshiqoñ kā
vahāñ ibādat harām Thahrī jahāñ tirā sañg-e-dar nahīñ hai

ibādat meñ abhī mashġhūl haiñ in ko na chheḌo
vafā kis se kareñge istiḳhāra chal rahā hai

rakhtā hai ibādat ke liye hasrat-e-jannat
zāhid kī ḳhudā saath mohabbat sababī hai

dozaḳh bhī kyā gumān hai jannat bhī hai fareb
in vasvasoñ meñ merī ibādat bhī hai fareb

imdād-o-ibādat meñ riyā-kārī na ho 'chāñd'
iḳhlās-e-amal par vahāñ in.aam bahut haiñ

halkā thā nadāmat se sarmāya ibādat kā
ik qatre meñ bah nikle tasbīh ke sau daane

hai saath ibādat ke abā bhī terī
shāmil hai riyāzat meñ riyā bhī terī

surḳh patthar ke sanam hoñ ki vo patthar ke sanam
but-kadoñ meñ to ibādat nahīñ hogī ham se