Tags-Identity

vo shakl vo shanāḳht vo paikar kī aarzū
patthar kī ho ke rah ga.ī patthar kī aarzū

is ahd kī shanāḳht Thahrī
sab kuchh hai magar nazar nahīñ hai

vahī to vaqt kī be-chehragī hai apnī shanāḳht
ki jis pe ab bhī hazāroñ naqāb baaqī haiñ

aasī kī kyā shanāḳht hai ma.asūm kī hai kyā
ye baat bārgāh-e-sazā-o-jazā se pūchh

ye mere haath haiñ aur be-shanāḳht ab bhī nahīñ
ye aur baat hai talvār toḌ dī maiñ ne

apnī alag shanāḳht bhī 'imrran' ho zarūr
vo shaḳhs apnī ziist meñ shāmil bhī chāhiye

shanāḳht kī ye kahānī bas ek nasl kī hai
phir is ke ba.ad fasāne idhar udhar se haiñ

shanāḳht us kī alag hai mirā vajūd alag
judā bhī mujh se nahīñ hai vo mujh meñ zam bhī nahīñ

koī ḳhvāb sar se pare rahā ye safar sarāb-e-safar rahā
maiñ shanāḳht apnī gañvā chukā ga.ī sūratoñ kī talāsh meñ

shanāḳht kar na sakā ā.ina-nazar bhī use
har ek shāḳh-e-badan laḳht laḳht aisī thī

inkār ab tujhe bhī hai merī shanāḳht se
lekin na bhuul ye tirī pahchān maiñ bhī huuñ

mohabbat koī numāyāñ nishān nahīñ
jis se laash kī shanāḳht meñ āsānī ho

basī jo aa ke zamīñ meñ 'samad' shanāḳht mirī
mire badan meñ sajā kar havās chhoḌ ga.ī

koī kar saktā nahīñ firqa-parastoñ kī shanāḳht
ek do kyā Toliyoñ kī Toliyāñ dehlī meñ haiñ

shanāḳht jis se zamāne meñ aadmī kī hai
ye iltijā hai ki tū mujh ko vo ḳhudī denā