Tags-Ijazat

ḳhvāb kā izn thā ta.abīr-e-ijāzat thī mujhe
vo samay aisā thā marne meñ suhulat thī mujhe

ijāzat agar sar paTakne kī hogī
muqaffal dar-e-yār ham khol leñge

be-dhaḌak dil ko dukhāyā kiije
is ināyat kī ijāzat kaisī

hamāre shahr meñ aane kī sūrat chāhtī haiñ
havā.eñ bāryābī kī ijāzat chāhtī haiñ

baiThne kī jo ijāzat mujhe DevḌhī pe milī
bole ahbāb mubārak tujhe darbāñ honā

tirī adā meñ hai inkār bhī ijāzat bhī
jo ham mileñge to duurī na qurbateñ hoñgī

maiñ ne dariyāoñ meñ bhī dasht kā manzar dekhā
jab ki pyāsā koī paanī kī ijāzat māñge

vo āñkhoñ se andhā thā kānoñ se bahrā
use apne chāroñ taraf dekhne kī ijāzat nahīñ thī

us shaḳhs kī ulfat meñ giraftār ye dil thā
jis shaḳhs ko chhūne kī ijāzat bhī nahīñ thī

saare jazboñ ke bāñdh TuuT ga.e
us ne bas ye kahā ijāzat hai

kitne sajdoñ kā qarz hai mujh par
sar jhukā luuñ agar ijāzat ho

chaman meñ haiñ baham parvāna o sham.a o gul o bulbul
ijāzat ho to maiñ bhī hāl-e-dil apnā bayāñ kar luuñ

hazāroñ shoḳh armāñ le rahe haiñ chuTkiyāñ dil meñ
hayā un kī ijāzat de to kuchh bebākīyāñ kar luuñ

hijr kī raat nahīñ Dhalne kī
ab charāġhoñ ko ijāzat diije

aisī mahfil meñ shirkat se kyā fā.eda aise logoñ se koī tavaqqo.a bhī kyā
jo kahā jaa.e ḳhāmosh sunte raho lab-kushā.ī kī qat.an ijāzat nahīñ

laakh kahte raheñ zulmat ko na zulmat likhnā
ham ne sīkhā nahīñ pyāre ba-ijāzat likhnā

dard dene ke vahāñ sāmāñ bahut
aur taḌapne kī ijāzat kam se kam

dar pe rahne kī ijāzat de kar
kahte haiñ paañv na phailā.iyegā

ijāzat ho to kah duuñ qissa-e-ulfat sar-e-mahfil
mujhe kuchh to fasāna yaad hai kuchh tum sunā denā

ḳhamoshī bas ḳhamoshī thī ijāzat ab huī hai
ishāroñ ko tire paḌhne kī jur.at ab huī hai