Tags-Independence

aa ga.ī hai fasl-e-āzādī magar
ḳhauf kā paudā harā hai mustaqil

mujhe tahzīb-e-hāzir ne atā kī hai vo āzādī
ki zāhir meñ to āzādī hai bātin meñ giraftārī

kiyā hai dil ne begāna jahān-e-murġh-o-māhī se
hameñ jāgīr-e-āzādī milī darbār-e-shāhī se

ḳhvāb hī to mile haiñ hameñ roTī ke ḳhvāb ta.alīm ke ḳhvāb
hukmarānoñ ne dikhā.e āzādī ke ba.ad na.ī tanzīm ke ḳhvāb

nāz-e-āzādī 'hasan' vaj.h-e-asīrī ho gayā
mū-kashāñ dil ko ḳhayāl-e-zulf-e-paimāñ le chalā

yuuñ haath nahīñ aatā vo gauhar-e-yak-dāna
yak-rañgī o āzādī ai himmat-e-mardāna

na qaid-e-shar.a baaqī hai na āzādī kī hai kuchh had
nahīñ kuchh guftugū is baab meñ ye nek hai yā bad

ḳhatt-e-āzādī likhā thā shoḳh ne fardā ġhalat
dil meñ rakhtā aur kuchh zāhir likhā inshā ġhalat

vo lamha bhar kī milī ḳhuld meñ jo āzādī
to qaid ho ga.e miTTī meñ ham sadā ke liye

bhalā.ī ye ki āzādī se ulfat tum bhī rakhte ho
burā.ī ye ki āzādī se ulfat ham bhī rakhte haiñ

hai tirī qaid meñ hī āzādī
Dhāñp le mujh ko chaar sū ho kar

aa inhīñ khañDaroñ pe āzādī kā parcham khol deñ
aa inhīñ khañDaroñ pe āzādī kā parcham khol deñ

ahd-e-āzādī se behtar qaid-e-zindāñ ho to phir
toḌ dene kī qafas ko kyuuñ koī tadbīr ho

kyā karishma hai mire jazba-e-āzādī kā
thī jo dīvār kabhī ab hai vo dar kī sūrat

vāhima ḳhallāq aur āzādī husn-afzā surūr
har fareb-rañg kā pahle gulistāñ naam thā

qaid se pahle bhī āzādī mirī ḳhatre meñ thī
āshiyāna hī mirā sūrat-numā-e-dām thā

us ko
tārīḳh se āzādī dī ga.ī thī

zehn kī parvāz ho yā shauq kī rāmish-garī
koī āzādī na thī jis meñ giraftārī na thī

ḳhvāb-e-āzādī insāñ kī ye ta.abīr nahīñ
ye vatan terī mirī nasl kī jāgīr nahīñ