Tags-Intezar

aah maiñ be-qarār kis kā huuñ
kushta-e-intizār kis kā huuñ

zamīn-e-ishq pe ai abr-e-e.atibār baras
visāl-e-yār kā bah jaa.e intizār baras

maiñ bahut jald lauT ā.ūñgā
tum mirā intizār mat karnā

maut kā intizār baaqī hai
aap kā intizār thā na rahā

ik nasl kā vajūd lahū ke numū meñ hai
kuchh der ḳhvāb dekh zarā intizār kar

ye aarzū ke sitāre ye intizār ke phuul
chamak rahī haiñ ḳhatā.eñ mahak rahe haiñ gunāh

harīf-e-bazm-e-tamāshā tirī nigāh nahīñ
vagarna husn to ḳhud tere intizār meñ hai

ye mahviyat koī dekhe ki misl-e-ā.īna
junūn-e-ḳhud-nigarī apne intizār meñ hai

shab-e-intizār meñ bār-hā mujhe 'anvar' aisā gumāñ huā
jise maut kahtā hai ye jahāñ vo kisī ke vaade kā naam hai

ham bhī nasīb se jo sitāra-nasīb the
sūraj kā intizār kiyā aur jal bujhe

ik raat meñ simaT ga.ī kul umr-e-ārzū
ik umr intizār kiyā aur jal bujhe

hai ḳhushī intizār kī har dam
maiñ ye kyuuñ pūchhūñ kab mileñge aap

muddat huī palak se palak āshnā nahīñ
kyā is se ab ziyāda kare intizār chashm

uḌ ga.e saare parinde mausamoñ kī chaah meñ
intizār un kā magar būḌhe shajar karte rahe

khile nigāh kī shāḳhoñ pe intizār ke phuul
havā meñ uḌte hue bādbāñ nazar aa.e

ham ahl-e-intizār ke aahaT pe kaan the
ThanDī havā thī ġham thā tirā Dhal chalī thī raat

ik umr kaT ga.ī hai tire intizār meñ
aise bhī haiñ ki kaT na sakī jin se ek raat

maanā ki terī diid ke qābil nahīñ huuñ maiñ
tū merā shauq dekh mirā intizār dekh

vo intizār kī lazzat bhī le gayā ai 'shauq'
havā ke ghoḌe pe zālim savār kyuuñ aayā

na harīf-e-jāñ na sharīk-e-ġham shab-e-intizār koī to ho
kise bazm-e-shauq meñ laa.eñ ham dil-e-be-qarār koī to ho