Tags-Ishq

tum usī ko vaj.h-e-tarab kaho ham usī ko bā.is-e-ġham kaheñ
vahī ik fasāna-e-ishq hai kabhī tum kaho kabhī ham kaheñ

maqām-e-be-ḳhudī ishq ai ma.āz-allāh
maiñ us jagah huuñ jahāñ mujh ko hosh-e-zāt nahīñ

mahfil-e-ishq meñ vo nāzish-e-daurāñ aayā
ai gadā ḳhvāb se bedār ki sultāñ aayā

tum se ab kyā kaheñ vo chiiz hai dāġh-e-ġham-e-ishq
ki chhupā.e na chhupe aur dikhā.e na bane

pahle the jo bhī aaj magar kārobār-e-ishq
duniyā ke kārobār se miltā huā sā hai

maza to ishq kā tab hai ki ek pal ko sahī
jhukī nazar vo uThā deñ aur maiñ salām karūñ

jaan sī Daal dī bujhe dil meñ
ishq kyā hai bas ik karishma hai

hisāb kaise kare koī ishq-o-ulfat meñ
diloñ ke saude meñ sūd-o-ziyāñ nahīñ hotā

sitam hai mubtalā-e-ishq ho jaanā javāñ ho kar
hamāre bāġh-e-hastī meñ bahār aa.ī ḳhizāñ ho kar

husn-e-ḳhalvat-talabī ke liye mahfil se uThā
ġhair az ishq jo jazba ho use dil se uThā

ishq jaisī koī shaḳhsiyyat-e-jāma.a na milī
ek bhī harf is afsāne kā mushkil se uThā

ishq meñ chheḌ huī dīda-e-tar se pahle
ġham ke bādal jo uThe to yahīñ par se pahle

dil ko ab aañkh kī manzil meñ biThā rakkheñge
ishq guzregā isī rāhguzar se pahle

chāhiye ishq meñ is tarah fanā ho jaanā
jis tarah aañkh uThe mahv-e-adā ho jaanā

vaq.at-e-ishq kahāñ jab ye talavvun ho vahāñ
kabhī raazī kabhī āshiq se ḳhafā ho jaanā

shahīd-e-ishq kī ye maut hai yā zindagī yārab
nahīñ ma.alūm kyuuñ bajtī hai shahnā.ī ka.ī din se

tarīq-e-ishq meñ hai rañj pahle aur ḳhushī pīchhe
madār-e-sub.h roz-e-vasl hai ik shām-e-hijrāñ par

dekh tasvīr ko majnūñ kī 'havas' rashk na kar
chāhiye ishq meñ terī bhī ye sūrat ho jaa.e

ik bāzi-e-ishq se haiñ aarī
khele haiñ vagarna sab jue ham

thā vo bachpan yā javānī jab sunā thā nām-e-ishq
aaj phir un ajnabī alfāz kī bāteñ kareñ