Tags-Ishq

vo tasavvur se na jaa.eñ jaan jaa.e yaar hai
mujh ko ye bhī be-ḳhudī-e-ishq meñ manzūr hai

nikālūñ armān kyuuñ na jī ke ki mast hoñ jām-e-ishq pī ke
maiñ sadqe is apnī be-ḳhudī ke ki dauḌ kar vo sambhālte haiñ

bad-nasībī ki ishq kar ke bhī
koī dhoka nahīñ huā mire saath

kyā husn ne samjhā hai kyā ishq ne jaanā hai
ham ḳhāk-nashīnoñ kī Thokar meñ zamānā hai

ishq kī betābiyoñ par husn ko rahm aa gayā
jab nigāh-e-shauq taḌpī parda-e-mahmil na thā

diyā na ishq ne jab kuchh to aql kyā degī
ab is se māñgte ho chain bāvle ho tum

jo husn-o-ishq se amn-o-amāñ meñ rahte haiñ
kahāñ ke log haiñ vo kis jahāñ meñ rahte haiñ

kalām-e-pāk meñ hai zikr-e-hazrat-e-yūsuf
ye husn-o-ishq har ik dāstāñ meñ rahte haiñ

mar kar bhī tah-e-ḳhāk na āsūda hue aah
ai ishq na the ham tire anjām se vāqif

rote ho bhalā kis liye jab jānte ho tum
ye ishq hai is ishq meñ kyā kyā nahīñ hotā

maslahat-bīñ hai agar ishq-e-junūñ-pesha to kyā
ab vo pahle kī tirā vus.at-e-sahrā bhī kahāñ

ishq meñ aur bhalā is ke sivā kyā hogā
dar se uThte haiñ to dīvār se lag jaate haiñ

sar ahl-e-ishq ke aksar jhukā nahīñ karte
agar jhuke bhī kahīñ phir uThā nahīñ karte

ham junūn-e-ishq ke bā-vasf bhī hoshyār haiñ
sub.h tere shahr meñ haiñ shaam tere shahr meñ

kyuuñ na ishq-allāh bolūñ hazrat-e-dil aap ko
peshvāoñ ne bhī apnī aan maanī aap kī

rone ko ab ashk bhī nahīñ haiñ
yā ishq ko sabr aa gayā hai

kuchh khel nahīñ hai ishq karnā
ye zindagī bhar kā rat-jagā hai

kuchh husn-e-vafā ke dīvāne phir ishq kī raah meñ kaam aa.e
ai kaash tamāshā karne ko ḳhud tū bhī kanār-e-bām aa.e

ishq kā naam garche hai mash.hūr
maiñ ta.ajjub meñ huuñ ki kyā shai hai

'ġhālib'-e-dānā se pūchho ishq meñ paḌ kar salīm
ek ma.aqūl aadmī kaise nikammā ho gayā