Tags-Ishq

na hoñ ḳhvāhisheñ na gilā koī na jafā koī
na savāl ahd-e-vafā kā ho vahī ishq hai

turfa shatrañj-e-mohabbat kī hai ġhā.eb baazī
shātir-e-ishq ko ho rahtī haiñ māteñ dil meñ

vasl kā saad bhī ho.egā 'hasan' sabr karo
daftar-e-ishq kī dauḌeñ haiñ barāteñ dil meñ

fitrat merī ishq-o-mohabbat qismat merī tanhā.ī
kahne kī naubat hī na aa.ī ham bhī kisū ke ho leñ haiñ

apnā vajūd maiñ ne ab is tarah paak kar liyā
jal kar tamām ishq meñ ḳhud ko hī ḳhaak kar liyā

ḳhvāboñ se vo nikal ke ab āñkhoñ meñ jāgne lagā
maiñ ne shadīd ishq meñ vo inhimāk kar liyā

ishq-vishiq ye chāhat-vāhat man kā bhulāvā phir man bhī apnā kyā
yaar ye kaisā rishta jo apnoñ ko ġhair kare maulā ḳhair kare

vo sañg-e-dil mazār-e-vafā par ba-nām-e-ishq
aa.ī to mere naam kā patthar lagā ga.ī

nahīñ giit bāda-o-jām ke yahāñ aur hī koī baat hai
ki maiñ jis balā meñ huuñ mubtalā vo balā-e-ishq-e-butāñ nahīñ

kis shahr se misāl duuñ aqlīm-e-ishq ko
jitnī ye ujḌī aur bhī bastī chalī ga.ī

balā-e-jāñ bhī hai jāñ-baḳhsh bhī hai ishq-e-butāñ
ajal ko uzr milā ziist ko bahāna huā

maraz-e-ishq ye mohlik hai ki us ke Dar se
charḳh-e-chārm ye jo DhūñDo to masīhā nikle

'sho.ala' tafta-dil mujhe ātish-e-ishq se hai kaam
merī nazar meñ tuur kī barq-e-sharāra-bār kyā

ishq miltā hai hijr ke hī evaz
ai dukāñ-dār tere daam kī daad

ishq kyā chiiz hai ye pūchhiye parvāne se
zindagī jis ko mayassar huī jal jaane se

maut kā ḳhauf ho kyā ishq ke dīvāne ko
maut ḳhud kāñptī hai ishq ke dīvāne se

husn be-ishq kahīñ rah nahīñ saktā zinda
bujh ga.ī sham.a bhī parvāne ke jal jaane se

kūcha-e-ishq se kuchh ḳhvāb uThā kar le aa.e
the gadā tohfa-e-nāyāb uThā kar le aa.e

aisā ziddī thā mirā ishq na bahlā phir bhī
log sach-much ka.ī mahtāb uThā kar le aa.e

jab milā husn bhī harjā.ī to us bazm se ham
ishq-e-āvāra ko betāb uThā kar le aa.e