Tags-Ishq

ishq meñ bevafā.ī kā ilzām
tujh pe dhar jā.ūñ ye kahāñ mumkin

chashm-e-hamdardī marīz-e-ishq in āñkhoñ se na rakh
kaam kyā nikle bhalā bīmār se bīmār kā

mānind-e-habāb aap kiyā ishq ne 'mamnūñ'
paayā na nishāñ jaama meñ apne kahīñ tan kā

ye karishma-sāzī-e-ishq kī mirī jaan zinda nazīr hai
jo faqīr thā vo amiir hai jo amiir thā vo faqīr hai

rāheñ haiñ do majāz o haqīqat hai jin kā naam
raste nahīñ haiñ ishq kī manzil ke chaar pāñch

ishq tajdīd kar ke dekhte haiñ
phir se ummīd kar ke dekhte haiñ

nihāl-e-ishq afsurda na hogā
tamanna-e-numū hotī rahegī

maiñ vo huuñ jis ke ġham ne tire dil meñ raah kī
ik umr jis ke ishq meñ ḳhud tū ne aah kī

sāzgār hai hamdam in dinoñ jahāñ apnā
ishq shādmāñ apnā shauq kāmrāñ apnā

ishq aur rusvā.ī kaun sī na.ī shai hai
ishq to azal se thā rusvā-e-jahāñ apnā

sozish-e-ġham ke sivā kāhish-e-furqat ke sivā
ishq meñ kuchh bhī nahīñ dard kī lazzat ke sivā

zanjīr meñ haiñ dair-o-haram kaun-o-makāñ bhī
hai ishq hameñ un se nahīñ jin kā gumāñ bhī

nām-e-ishq-e-butāñ na lo 'momin'
kījiye bas ḳhudā ḳhudā sāhab

maiñ jise ishq kī me.arāj samajh baiThā thā
vo tapasyā bhī mirī bhañg huī hai is baar

jab maiñ ne kahā martā huuñ muñh pher ke bole
sunte to haiñ par ishq ke maare nahīñ dekhe

ro-ro ke hāl-e-ishq jo kahtā huuñ un se maiñ
hañs hañs ke mujh se kahte haiñ ham ko yaqīñ nahīñ

vo dil udaas hai ki jo ḳhālī hai ishq se
vīrāñ hai vo makān ki jis meñ makīñ nahīñ

kār-zār-e-ishq meñ aane ke ba.ad
rañg-e-mīrās-e-ab-o-jad khul gayā

terī sūrat nigāhoñ meñ phirtī rahe ishq terā satā.e to maiñ kyā karūñ
koī itnā to aa kar batā de mujhe jab tirī yaad aa.e to maiñ kyā karūñ

ishq ilzām bhī to hotā hai
ye burā kaam bhī to hotā hai