Tags-Ishq

pahle vo kār-e-ishq meñ uljhā rahā bahut
phir ḳhud meñ vo ḳhudā kā nishāñ DhūñDhtā rahā

donoñ lāzim haiñ lā-zavāl bhī haiñ
ik tirā husn ik mirā ye ishq

dil jalva-gāh-e-husn banā faiz-e-ishq se
vo daaġh hai ki shāhid-e-rānā kaheñ jise

thā hāsil-e-ishq apnā
jo rizq-e-havas rahā hai

husn bhī kambaḳht kab ḳhālī hai soz-e-ishq se
sham.a bhī to raat bhar jaltī hai parvāne ke saath

zamīñ se uTThī hai yā charḳh par se utrī hai
ye aag ishq kī yā-rab kidhar se utrī hai

hai ta.ajjub aaj tak bhī ishq kyoñ rusvā nahīñ
dard be-āvāz sā hai ġham kā bhī saaya nahīñ

duur tak miltā nahīñ hai us meñ āshiq kā vajūd
ishq aisī dhuup hai jis meñ koī saaya nahīñ

kyā ḳhabar thī ishq meñ aisā bhī ik daur aa.e hai
baat kaisī saañs letā huuñ to jī ghabrā.e hai

ishq ke maare hue duniyā ko dekheñ bhī to kyā
jab nazar uThtī hai koī sāmne aa jaa.e hai

husn chhuptā phir rahā hai muḳhtalif pardoñ meñ 'kaif'
ishq kī zālim nazar ke sāmne kaun aa.e hai

ishq kī rut meñ saare bhikārī
rājā-rānī ho jaate haiñ

mire zarf-e-ishq pe shak na kar mire harf-e-shauq ko bhuul jā
jo yahī hijāb hai darmiyāñ ye hijāb uThā ke bhī dekh le

aap ko shauq hai to maz.hab ham
ishq kā iḳhtiyār karte haiñ

ye jo ishq kī siyah shaal hai ye vabāl hai
use yuuñ na dekh ke muskurā ki maiñ ro paḌūñ

ishq ne husn kī be-dād pe ronā chāhā
tuḳhm-e-ehsās-e-vafā sañg meñ bonā chāhā

bojh hai ishq to phir kaise sambhāleñ us ko
duur tak saath chaleñ is kā to imkān nahīñ

baras rahī hai harīm-e-havas meñ daulat-e-husn
gadā-e-ishq ke kaase meñ ik nazar bhī nahīñ

ai masīhā-dam tire hote hue kyā ho gayā
baiThe-biThlā.e marīz-e-ishq ThanDā ho gayā

umr-bhar kī mushkileñ pal bhar meñ āsāñ ho ga.iiñ
un ke aate haiñ marīz-e-ishq achchhā ho gayā