Tags-Ishq

ishq meñ jaan se guzarne ko
ik hamīñ rah ga.e haiñ marne ko

un se nahīñ kuchh shikva ham ko un se nahīñ kuchh rañj-o-malāl
kis se ai dil ishq kiyā kis se chaah ko bartā hai

ishq ke daaġh ko dil mohr-e-nabuvvat samjhā
Dar hai kāfir kahīñ dāvā-e-nabūvat na kare

bin jale sham.a ke parvāna nahīñ jal saktā
kyā baḌhe ishq agar husn hī sabqat na kare

ishq se baaz aate ham dīvāne kyā
thī samajh kī baat ham samjhe nahīñ

ne.amat-e-ishq mayassar nahīñ aatī sab ko
sāhab-e-zar bhī yahāñ haath pasāre hue haiñ

kaash ai dard-e-ishq tere liye
dil mirā intiḳhāb ho jaatā

ham se chhūTā qimār-ḳhāna-e-ishq
vaañ jo jāveñ girah meñ maal kahāñ

fitrat-e-ishq gunahgār huī jaatī hai
fikr-e-duniyā bhī ġham-e-yār huī jaatī hai

shauq ne kī jo rahbarī dil kī
manzil-e-ishq tai huī dil kī

hosh vāloñ ko ḳhabar kyā be-ḳhudī kyā chiiz hai
ishq kiije phir samjhiye zindagī kyā chiiz hai

vo adab ishq ne baḳhshā ki hameñ
muddatoñ baat na karnā aayā

ishq hī ishq ho āshiq ho na ma.ashūq jahāñ
aisī ik dargah-e-tauhīd-ma.āb aur bhī hai

maslak-e-ishq meñ hai fikr harām
dil ko tadbīr-āshnā na kareñ

vo ishq ki sach ā.ankhoñ se kājal ko churā le
kis tarah na āshiq ke kare ḳhvāb kī chorī

hai hijr to kabāb na khāne se kyā usuul
gar ishq hai to kyā hameñ mar jaanā chāhiye

na jaane kaun sī uftād aa paḌī hai ki jo
ham ahl-e-ishq ko kār-e-jahāñ bulātā hai

use bhī apne sañvarne kā kab ḳhayāl aayā
jab ahl-e-ishq ko kār-e-jahāñ bahut se haiñ

'at.har' tum ne ishq kiyā kuchh tum bhī kaho kyā haal huā
koī nayā ehsās milā yā sab jaisā ahvāl huā