Tags-Ishq

aap ke ġhamze uThā.ūñ ġhair ke taane sunūñ
banda parvar maiñ ne chhoḌā ishq bhī sarkār kā

ishq-e-butāñ hai ḳhvāb-e-farāmosh ai ḳhudā
aayā hai phir ḳhayāl tirī yaad kī taraf

na ishq bā-adab rahā, na husn meñ hayā rahī
havas kī dhūm-dhām hai, nagar nagar, galī galī

ishq se ham ko rihā.ī nahīñ achchhī lagtī
ham vo panchhī haiñ ki jo jaal meñ ḳhush rahte haiñ

kūcha-e-ishq meñ nikal aayā
jis ko ḳhāna-ḳharāb honā thā

mirī bechainiyoñ ko chain kuchh to aa hī jā.egā
tabīb-e-ishq mujh ko dekhne aa.e to achchhā ho

do hukm haiñ shāh-e-ishq ke in meñ ek galnā hai ek jalnā
haiñ daftar-e-dard meñ qabāle ze-āb avval do.am ba-ātish

na khol vaa.iz kitāb-e-dānish ki ātish-e-ishq o āb-e-mai se
dho.ūñ jalā.ūñ tire risāle ze-āb avval do.am ba-ātish

sitam hai aafat hai mahr yā kiiñ balā ye ishq-e-satīza-gar kī
diloñ ke ḳhāne ujaaḌ Daale ze-āb avval do.am ba-ātish

ḳhush aayā ajab ishq ko ye jāma-e-zebā
niklā nahīñ phir hijr kī poshāk se bāhar

ġham-e-ishq hī ne kaaTī ġham-e-ishq kī musībat
isī mauj ne Duboyā isī mauj ne ubhārā

havas kā naam ishq hai talab ḳhudī kā naam hai
nazar udaas dil malūl ruuh tishna-kām hai

vo vahīñ thā jahāñ dikhā.ī diyā
ishq meñ ye kahāñ dikhā.ī diyā

thā azal se dil-e-'āzam' meñ koī aur makīñ
us meñ kyā ishq hasīnāñ kī samā.ī hotī

merī nazroñ se koī ai 'shauq' sīkhe jazb-e-ishq
ban ke til āñkhoñ meñ us ke ruḳh kā ḳhaal aa hī gayā

ujrat-e-ishq bahut kam thī sau ham ne 'shahzād'
dil ko is tangī-e-aflāk se bāhar rakkhā

sukūn-e-ahl-e-ḳharābāt-e-ishq kyā kahiye
rukī rukī sī yahāñ umr-e-tez-gām bhī hai

ishq-e-junūñ-navāz rahā bazm-e-nāz meñ
ik iztirāb-o-shauq kī duniyā liye hue

sirāt-e-ishq hai aur hijr kī tanhā masāfat hai
vahī hai tishnagī phir bhī fareb-e-āb zinda hai

ishq-āsār zuleḳhāoñ kī is bastī meñ
sāhibo pākī-e-dāmāñ pe bharosa na karo