Tags-Ishq

'amīr' is ishq kā mujh se na pūchho
pata tum sab ko hai kis ko pata na.iiñ

yā ḳhudā dair meñ sāmāñ na huā thā so huā
kāfir-e-ishq musalmāñ na huā thā so huā

baḌhā chal shauq se ai ishq ke raahī ki is rah par
kahīñ bastī bhī aa.egī agar vīrāne aa.e haiñ

fazā-e-ishq ko mātam-gusār chhoḌ gayā
jahāñ meñ naqsh-e-vafā yādgār chhoḌ gayā

pahelī ḳhud thī hastī ishq ne kuchh aur uljhā.ī
koī ai 'sehr' kyā samjhe nahīñ maiñ rāz-dāñ apnā

nabard-e-ishq meñ kyā kyā jigar kiyā 'tauqīr'
havā kā lams bhī jab intiqām-e-hiñda thā

butoñ se tujh ko umīdeñ ḳhudā se naumīdī
mujhe batā to sahī aur kāfirī kyā hai

ishq kī aaj intihā kar do
ruuh ko jism se judā kar do

bahut kahā thā ki ishq āḳhir to ishq Thahrā
bahut kahā thā kisī ko is kī ḳhabar na karnā

hai tamannā ki chamakte raheñ mehvar ke baġhair
havas-e-ḳhām na de ishq tū lā-fānī de

ishq hī tanhā nahīñ shorīda-sar mere liye
husn bhī betāb hai aur kis qadar mere liye

us maqām-e-ishq meñ huuñ marhabā ai be-ḳhudī
zarra zarra hai jahāñ garm-e-safar mere liye

jazb ho kar rah gayā huuñ maiñ jamāl-e-dost meñ
ishq hai tābinda-tar pā.inda-tar mere liye

allāh allāh maiñ bhī kyā nāzuk-dimāġh-e-ishq huuñ
nik.hat-e-gul bhī hai vaj.h-e-dard-e-sar mere liye

jahān-e-husn ke asrār pā nahīñ saktā
jo ishq apnī hadoñ tak hī be-qarār rahe

jinheñ kahiye ishq kī vus.ateñ jo haiñ ḳhaas husn kī azmateñ
ye usī ke qalb se pūchhiye jise faḳhr ho ġham-e-yār par

ye kamāl-e-ishq kī sāzisheñ ye jamāl-e-husn kī nāzisheñ
ye ināyateñ ye navāzisheñ mirī ek musht-e-ġhubār par

ishq abrū o mizhgāñ kā buto saath hai dam ke
ḳhanjar mujhe dikhlāo ki talvār dikhāo

vo ishq jis kī zamāne ko bhī ḳhabar na rahī
tire bichhaḌne se rusvā nagar nagar meñ rahā

'mus.hafī' Tal ga.e sab mārka-e-ishq ke biich
vo jo Thahre rahe haiñ ek zarā ham hī haiñ