Tags-Ishq

baḌī mushkil se samjhe haiñ shahīd-e-ishq kā mansab
'sahar' ab zindagī bār-e-girāñ mālūm hotī hai

aise marīz-e-ishq kā kis se ilaaj ho
paidā kare mizāj meñ jis ke davā bigāḌ

kabhī sozisheñ kabhī āfateñ kabhī ranjisheñ kabhī rāhateñ
milīñ chaar ham ko ye ne.amateñ tire ishq meñ jo fanā hue

rakh ke shatranj-e-ġhā.ebāna-e-ishq
tum chale ik to imtihāñ kī chaal

pahnā jo maiñ ne jāma-e-dīvāngī to ishq
bolā ki ye badan pe tire saj gayā libās

ishq vo arsa-e-pur-ḳhār hai hamdam ki jahāñ
zindagī raas na aa.e to qazā bhī na mile

ġham kā ehsās javāñ ho to ġhazal hotī hai
ishq maa.il ba fuġhāñ ho to ġhazal hotī hai

mirā ishq shart-e-visāl se rahe muttasil
nahīñ dekhnā mujhe ḳhvāb-e-shab shab-e-ḳhvāb meñ

zi-bas hālāt-e-ishq ab ham pe taarī hai sadā 'jur.at'
ba-tarz-e-āshiqāna kahte haiñ ash.ār-e-'hālī' ham

khudā.iyoñ meñ milegā gadā-e-ishq kā taaj
sar-zamīñ to havas ke zamāne zinda haiñ

shaiḳh san.ā banā hai ishq meñ dil
but ko sajda kiyā salām kiyā

asar-e-husn kahūñ yā kashish-e-ishq kahūñ
maiñ tamāshā.ī thā vo mujh ko tamāshā samjhā

haañ kab ba-nām-e-ishq havas surḳh-rū na thī
haañ kab niyāz-e-shauq subuk kū-ba-kū na thā

chashm-e-pur-nam tham ke ab merī suno
ishq meñ ye kaisī ujlat chup raho

ishq vāloñ se hasab aur nasab pūchhte ho
log haiñ ye to miyāñ ūñche gharāne vaale

vo mujh se martaba-e-ishq meñ buland rahe
ḳhudā kare vo chalā jaa.e māvarā-e-junūñ

kahīñ sakūñ na milā ishq se farār ke ba.ad
kisī tarah na mirā dard-e-sar tamām huā

aage bhī ishq meñ huiiñ rusvā.iyāñ magar
ab ke vafā kā zaḳhm jabīñ par lagā mujhe

aadhā adhūrā hijr javānī chabā gayā
aadhe adhūre ishq meñ bachpan havā huā

dil ko ai ishq sū-e-zulf-e-siyah-fām na bhej
rahzanoñ meñ tū musāfir ko sar-e-shām na bhej