Tags-Ishq

na sambhlā āsmāñ se ishq kā bojh
hamīñ haiñ jo ye magdar bhānte haiñ

murīd-e-ḳhāndān-e-ishq jo hai
ham apnā piir use gardānte haiñ

phir koī chaak garebān liye phirtā hai
hazrat-e-ishq ne phir koī sharārat kī hai

gar ishq hai to dekhne piv ko shitāb aa
lā-shak ho haq kī rah meñ chalā be-hijāb aa

dariyā meñ dil ke ishq suuñ hone ke ta.iiñ muhīt
ḳhālī ho sab ḳhudī suuñ nikal juuñ habāb aa

ishq ho mast-o-ġhazal-ḳhvān-o-surāhī-bar-dosh
zindagī tāza-o-sarshār-o-muattar laanā

vaqār-e-ishq par us daur se bhī harf aatā hai
'azīz-vārsī' vo dard jo paiham nahīñ hotā

dāman-e-sham.a pe dhabbā na rahā vaah re ishq
ḳhuun ab tak nazar aayā nahīñ parvāne kā

husn aur ishq ke nairañg ḳhudā hī jaane
sham.a jaltī hai ki dil jaltā hai parvāne kā

tum ko fursat ho agar banñe-sañvarne se nadīm
ishq farmāne se behtar hai ki ārām karo

tere liye sab chhoḌ ke terā na rahā maiñ
duniyā bhī ga.ī ishq meñ tujh se bhī gayā maiñ

ab taish meñ aate hī pakaḌ letā huuñ paañv
is ishq se pahle kabhī aisā to na thā maiñ

phir ishq kī nazar meñ hai māshūqiyat kā naaz
phir husn-e-dil-navāz se shīr-o-shakar haiñ ham

āñkhoñ meñ nūr-e-mus.haf-e-jānāñ liye hue
phir kardgār-e-ishq ke paiġhām-bar haiñ ham

ik jahāñ aur pas-e-kār-e-jahāñ thā baaqī
ik badan aur mire ishq kī takmīl meñ thā

ishq meñ kuchh is tarah dīvāngī chhā.ī ki bas
kūcha-e-arbāb-e-dil se ye sadā aa.ī ki bas

kabhī ishq sāz-e-hayāt thā kabhī soz-e-dil ne jalā diyā
kabhī vasl meñ bhī kasak rahī kabhī dard-o-ġham ne bhī mazā diyā

mushāhide ko ik ā.īna-e-jamāl diyā
kamāl-e-ishq ne jauhar dikhā diye dil ke

vahshat-e-dil fuzūñ to hai haal mirā zubūñ to hai
ishq nahīñ junūñ to hai us ke asar ko kyā karūñ

ishq in zālimoñ kī duniyā meñ
kitnī mazlūm zaat hai ai dil