Tags-Ishq

ishq parde meñ rahe kab talak ai josh-e-junūñ
ham bhī tūfān kā sāmān kiye baiThe haiñ

dard-e-hijrāñ ke tasalsul se na ghabrā dil-e-zār
ishq ne dard ke andar hī davā rakkhī hai

tabīboñ se ilāj-e-ishq hotā hai nipaT mushkil
hamāre dard kī un se nahīñ hone kī davā hargiz

dil jis kā dard-e-ishq kā hāmil nahīñ rahā
vo shaḳhs tere pyaar ke qābil nahīñ rahā

ham kashtī-e-ishq ke musāfir
utre nahīñ paar yaad rakhnā

kyā kiyā ishq ne kyuuñ hazrat-e-dil
ham na kahte the ki pachhtā.iyegā

ai 'sabā' ishq-e-parī-rūyāñ meñ
ādamiyyat se guzar jā.iyegā

ḳhudā-e-husn-azal ne mujhe navāzā hai
ḳhumār-e-ishq se sarf-e-nazar nahīñ huī maiñ

husn-e-butāñ kā ishq merī jaan ho gayā
ye kufr ab to hāsil-e-īmān ho gayā

sab merā ishq dekh ke lete haiñ terā naam
maiñ bhī tire jamāl kī pahchān ho gayā

jo likho ibārat-e-ishq tum to anā kā koī na pech ho
jo lab-e-davāt pe jhuk gayā vo qalam hī naqsh banā sakā

ḳhaak kā ḳhāna ġharībāna-badan hai ki jise
raunaq-e-ishq ne shāhāna banā rakkhā hai

aadmī ho ki ḳhudā sab kā barābar hai vazn
ishq ne ek hī paimāna banā rakkhā hai

kar ke tauba qaul hai ab hazrat-e-dil kā yahī
ab kabhī leñge na nām-e-ishq-e-ḳhūbāñ bhuul kar

ishq meñ yuuñ to sabhī sūd-o-ziyāñ tak pahuñche
kam haiñ aise jo mire azm-e-javāñ tak pahuñche

tum rah-e-ishq meñ lillāh mirā saath na do
silsila ġham kā ḳhudā jaane kahāñ tak pahuñche

shikast-e-dil hai to kyā rāh-e-ishq tark na kar
ye dekh kyā kahīñ parvarda-e-ziyāñ koī hai

kiyā to hai ishq hazrat-e-dil liyā hai sar par ye bār-e-mushkil
huā agar mudda.ā na hāsil to raaz ifshā na kījiyegā

hañs rahā huuñ yaad kar ke ishq kī nādāniyāñ
sun rahā huuñ dāstāñ apnī tire andāz meñ

tum na hote is qadar rusvā zamāne meñ 'shajī.a'
soch lete ishq kā anjām agar āġhāz meñ