Tags-Ishq

ishq aa ham suuñ kiyā jab raam raam
ham kisī haajī ko nahiñ karte salām

pūchhtā hai kyā hamāre ramz ko
be-samajh be-ishq zāhid ḳhaam ḳhaam

sharmā ga.e lajā ga.e dāman chhuḌā ga.e
ai ishq marhabā vo yahāñ tak to aa ga.e

ab kyā karūñ maiñ fitrat-e-nākām-e-ishq ko
jitne the hādsāt mujhe raas aa ga.e

tirī abrū hai mehrāb-e-mohabbat
namāz-e-ishq mere par huī farz

sab kuchh hai aur kuchh nahīñ ai dād-ḳhvāh-e-ishq
vo dekh kar na dekhnā nīchī nigāh se

ġhurūr-e-husn na kar jazba-e-zuleḳhā dekh
kiyā hai ishq ne yūsuf ġhulām āshiq kā

hue barbād jis ke ishq meñ ham
vo ab jā kar zarā achchhā lagā hai

donoñ ne dard-e-ishq ko taqsīm kar liyā
thoḌā sā dil meñ hai to zarā sā jigar meñ hai

zindagī vo kyā jo hai nā-vāqif-e-āshob-e-ishq
sīna-e-ādam meñ tūfānoñ ko palnā chāhiye

siine meñ mire dāġh-e-ġham-e-ishq-e-nabī hai
ik gauhar-e-nāyāb mire haath lagā hai

yahāñ to ḳhud tirī hastī hai ishq ko darkār
vo aur hoñge jinheñ muskurā ke luuT liyā

ḳhushā vo jaan jise dī ga.ī amānat-e-ishq
rahe vo dil jise apnā banā ke luuT liyā

kitāb-e-ishq haiñ lekin na itnī farsūda
ki be-paḌhe hī faqat mez par sajāo hameñ

pahle pahle ishq meñ akasr hotā hai
achchhe achchhe lag jaate haiñ bistar se

bahut hī TeḌhā hai ai dost ishq kā rasta
baġhair rāh-numā ke sambhal sako to chalo

kisī se ishq ho jaane ko afsāna nahīñ kahte
ki afsāne mata-e-kūcha-o-bāzār hote haiñ

mire ishq kā ye meyār ho ki visāl bhī na shumār ho
isī e'tibār pe ho karam ki fareb meñ bhī yaqīn ho

jahāñ zikr-e-mehr-o-vafā mile vahīñ 'indirā' kā qalam chale
ye kitāb-e-ishq meñ ho raqam ki fareb meñ bhī yaqīn ho

us kā ye husn vahm hai terā ye ishq hai gumāñ
itnā yaqīn dil mire vahm-o-gumān par na kar