Tags-Jealousy

ġhubār-e-kīna-o-buġhz-o-hasad se paak hai ye dil
hamāre aa.ine ne muñh nahīñ dekhā kudūrat kā

hasad se dil agar afsurda hai garm-e-tamāshā ho
ki chashm-e-tañg shāyad kasrat-e-nazzāra se vā ho

agar aa ke ġhussa nahīñ rahā to lagī thī aag ki bujh ga.ī
jo hasad kā josh faro huā to ye zahr chaḌh ke utar gayā

hasad jī meñ bharā hai laag hai ik umr se dil meñ
kareñ zāhir agar mauqā hai iz.hār-e-adāvat kā

sitāroñ se hasad kī intihā hai
maiñ qabroñ par charāġhāñ kar rahā huuñ

dil to ā.īna hai shaffāf rakheñ ai 'shāhid'
kyuuñ kareñ buġhz-o-hasad kis liye kiina sīkheñ

log rakhte haiñ diloñ meñ ātish-e-buġhz-o-hasad
aur phir karte haiñ shikva jal rahā hai tan badan

na koī tiir na sāzish na tohmateñ na hasad
kisī ne mujh se baḌī be-svād nafrat kī

rāt-din sunte haiñ tasvīlāt-e-arbāb-e-hasad
ehtiyāj-e-dushmanāñ bhī hai hunar ko be-gumāñ

maiñ aur kuchh nahīñ kahtā magar ye sun rakhiye
adū kā dil hai labālab hasad se kiine se

tanz dushnām lānat adāvat hasad
in rafīqoñ kā saaya rahā aur maiñ

hasad kī aag meñ jaltā hai ab tak
barastī hai adū kī qabr par aag

yuuñ mudda.ī hasad se na de daad to na de
'ātish' ġhazal ye tū ne kahī āshiqāna kyā

shā.erī hī nahīñ kuchh bā.is-e-izzat mujh ko
aur bahut kuchh hasad o rashk ke asbāb meñ hai

ye hasad jahāñ kī nazar meñ hai ġham-e-'dānā' un ke jigar meñ hai
hai sabhī ko pyaar se dushmanī tire gaañv meñ mire shahr meñ

ye ahl-e-fan meñ bhī kiiḌe nikāl dete haiñ
hasad kā tauq jo haiñ gardanoñ meñ Daale hue

mirī rafīq-e-safar thiiñ hasad bharī nazreñ
vo āsmān thā aur mere iḳhtiyār meñ thā

buġhz-o-hasad-o-nafrat nākāmī-o-mahrūmī
insānoñ kī bastī meñ kyā hai koī insāñ bhī

hasad kī ek tavā.if suhā.ī āñkhoñ ko
vafā se is liye dāman chhuḌā liyā maiñ ne

is lagāvaT bhare lahje kī jagah hai dil meñ
tahniyat meñ jo riyā aur hasad hai rad hai