Tags-Justaju

tirī vahshat liye phirtī hai garm-e-justujū mujh ko
sukūñ-andoz hone kī bahut hai aarzū mujh ko

ai zauq-e-jushtujū tirī himmat pe āfrīñ
manzil ko har qadam pe gurezāñ banā diyā

ai yaar justujū meñ tirī sūrat-e-ġhubār
sar-gashta huuñ pa gardish-e-daurāñ se duur huuñ

vādī-e-justujū se guzrīñ to kyā ajab hai
vārafta kaise kaise lail-o-nahār haiñ ham

mujh se adā huā hai 'jigar' justujū kā haq
har zarre ko gavāh kiye jā rahā huuñ maiñ

is ḳharābī meñ tire vāste phirte haiñ ḳharāb
justujū ham ko hai ai kunj-e-nihānī terī

hamārā dil use ab DhūñDtā hai
thake haiñ paañv jis kī justujū se

nazar aayā na kahīñ nāseh-e-nādāñ merā
justujū jis kī thī vo miTTī kā babuvā na milā

tilism-ḳhāna-e-hasrat meñ gardisheñ kab tak
vo ism de ki ho āseb-e-justujū bātil

idhar mirā dil taḌap rahā hai tirī javānī kī justujū meñ
udhar mire dil kī aarzū meñ machal rahā hai shabāb terā

vahī manzileñ vahī dasht o dar tire dil-zadoñ ke haiñ rāhbar
vahī aarzū vahī justujū vahī rāh-e-pur-ḳhatar-e-junūñ

kab se bhaTak raheñ haiñ tirī justujū meñ ham
apnī koī zamīñ koī aflāk bhī nahīñ

the justujū meñ roz-e-azal jā-e-dard kī
aayā pasand dil mirā is intiḳhāb meñ

mujhe le jaa.e jo manzil kī jānib
ab aise kārvāñ kī justujū hai

mujhe din raat rahtī hai tumhārī justujū ab bhī
tasavvur meñ kiyā kartā huuñ tum se guftugū ab bhī

nadīm kis ke qadam haiñ ye zeb-e-kāhkashāñ
chalā ye kaun kidhar kis kī justujū ke liye

rumūz-e-arsh to khul jā.eñge kabhī na kabhī
hayāt vaqfa hai ḳhud apnī justujū ke liye

na jaane kab se huuñ sargarm-e-justujū ai dost
na jaane kab ruḳh-e-manzil nigāh tak pahoñche

bahut dushvār hai chalnā sirāt-e-dīn-e-fitrat par
ḳhudā kī justujū meñ har nafas sho.ala ugaltā hai