Tags-Justaju

sochnā ye hai ki us kī justujū hone talak
saath apne ḳhud raheñ ham yā zamānā chāhiye

ab is se aur ziyāda kyā banā.eñ
tumhārī justujū hai aur kyā hai

koī rah-rau na koī rahbar thā
justujū jis maqām se guzrī

nahīñ nahīñ hameñ ab terī justujū bhī nahīñ
tujhe bhī bhuul ga.e ham tirī ḳhushī ke liye

dil nā-sazā ko ye chāhtā huuñ ki chaah meñ kahīñ Daal duuñ
use hai gunāh kī justujū to mujhe sazā kī talāsh hai

mujhe justujū hai junūn kī mujhe be-ḳhudī kī hai aarzū
mire kārvān-e-hayāt ko kisī rahnumā kī talāsh hai

na.e hausle na.e valvale mirī justujū meñ mudām haiñ
mujhe intihā-e-talāsh meñ bhī to ibtidā kī talāsh hai

ik justujū sadā hī se zehn-e-bashar meñ hai
jab se milī zamīn musalsal safar meñ hai

ḳharāboñ meñ ab un kī justujū kā silsila kyā hai
mire gardūñ-shikār aa.eñ idhar aisā nahīñ hogā

bhaTak bhaTak ke maiñ nākām-e-justujū hī rahā
ḳhamosh mere liye sham-e-rahbarī kyuuñ hai

justujū thī manzil-e-mauhūm kī
ye zamīñ thī āsmāñ thā aur maiñ

rakhe tū jab tak jahāñ meñ yā-rab tire karam se umiid ye hai
rahe na mutlaq talāsh-e-daulat kareñ na duniyā kī justujū ham

ġharaz hai dair se mujh ko na fikr ka.abe se
maiñ apne aap meñ kartā huuñ justujū terī

abas ki mujh pe hai ilzām-e-ḳhud-farāmoshī
haram se der meñ laa.ī hai justujū terī

rāhat kī justujū meñ ḳhushī kī talāsh meñ
ġham pāltī hai umr-e-gurezāñ na.e na.e

'asad' hai justujū jis kī use paanā to hai aksar
yūñhī rahnā safar meñ ānā-jānā DhūñDte rahnā

ham tujh se kis havas kī falak justujū kareñ
dil hī nahīñ rahā hai ki kuchh aarzū kareñ

aaj phir justujū kī maut huī
aaj phir merā hausla TuuTā

jis pe merī justujū ne Daal rakkhe the hijāb
be-ḳhudī ne ab use mahsūs o uryāñ kar diyā

na vo aarzū na vo justujū na vo rañg-e-jāma-e-be-rafū
bhalā is vajūd kā vazn kyā jo madār-e-shauq se haT gayā