Tags-Khizan

bahār-e-javānī hayāt-e-javānī na ye ġhair-fānī na vo ġhair-fānī
urūs-e-chaman kā utartā hai gahnā ḳhizāñ ke zamāne meñ hotī hai patjhaḌ

vo bahāroñ kā ho mausam yā ḳhizāñ kī rut ho
pyaar ke baaġh meñ har gul kī mahak baaqī hai

jahāñ kashūd-e-navā par ḳhizāñ ke pahre haiñ
vahīñ bahār-e-ġhazal-ḳhvāñ hai dekhiye kyā ho

qaabū ḳhizāñ se zo.af kā gulshan maiñ ban gayā
dosh-e-havā pe rañg-e-gul-o-yāsaman gayā

huuñ maiñ vo dil-soḳhta tāsīr-e-āh-e-garm se
gulshan-e-jannat meñ bhī daur-e-ḳhizāñ paidā karūñ

asīrān-e-qafas ko vāsta kyā in jhameloñ se
chaman meñ kab ḳhizāñ aa.ī chaman meñ kab bahār aa.ī

mujhe gulshan se ai josh-e-junūñ sahrā ko ab le chal
yahāñ is ke sivā kiyā hai ḳhizāñ aa.ī bahār aa.ī

kuchh shikasta sā hai rañgīnī-o-nik.hat kā tilism
yahī bedād-e-ḳhizāñ hai to ḳhizāñ aur sahī

do roz ek vaz.a pe rañg-e-jahāñ nahīñ
vo kaun sā chaman hai ki jis ko ḳhizāñ nahīñ

pazhmurda ek hai to shagufta hai dūsrā
bāġh-e-jahāñ meñ fasl-e-bahār-o-ḳhizāñ nahīñ

maiñ ek barg-e-ḳhizāñ-dīda huuñ zamīn kā bojh
havā-e-dahr tire dosh par uḌā na gayā

ye kahāñ bahār-e-jamāl hai ki jahāñ ḳhizāñ na zavāl hai
tirī bazm-e-nāz se jo uThā vo hasīñ uThā vo javāñ uThā

asar-āfrīn-e-bahār hai tirī fikr 'shā.ir'-e-ḳhush-navā
jinheñ chhū sake na ḳhizāñ kabhī vahī phuul le ke ġhazal ke aa

ye hādsa hai ki donoñ ḳhizāñ-sarisht hue
magar bahār kā ik ahd darmiyān meñ thā

ajab nahīñ kabhī naġhma bane fuġhāñ merī
mirī bahār meñ shāmil hai ab ḳhizāñ merī

isī tarah ḳhūn-e-dil se tū chaman ko sīñchtā jā
ye ḳhizāñ 'shamīm' jab tak ki bahār ho na jaa.e

bahār-e-lāla-o-gul ke qasīde ḳhatm hue
ḳhizāñ kā marsiya paḌhtā hai har shajar ab ke

ḳhizāñ kī āfateñ phirtī haiñ ab tak merī nazroñ meñ
bahār-e-chañd-roza kyā dikhātā hai chaman mujh ko

na ḳhizāñ meñ hai koī tīrgī na bahār meñ koī raushnī
ye nazar nazar ke charāġh haiñ kahīñ bujh ga.e kahīñ jal ga.e

daaġh huuñ lāla-e-aqavām-e-jahāñ ke dil kā
maiñ bahāroñ ke kaleje pe ḳhizāñ rakhtā huuñ