Tags-Khizan

vo kyā din the yahīñ ham ne bahāroñ kī duā kī thī kisī ne bhī nahīñ sochā
chaman vāloñ ne mil kar jab ḳhud apnā hī chaman luuTā ḳhizāñ ke āḳhirī din the

bahār aa.ī na thī lekin havāoñ meñ na.e mausam kī ḳhushbū raqs kartī thī
achānak jab kahā tum ne mire muñh par mujhe jhūTā ḳhizāñ ke āḳhirī din the

tumhārā haath jab mere larazte haath se chhūTā ḳhizāñ ke āḳhirī din the
vo mohkam be-lachak va.ada khilaune kī tarah TuuTā ḳhizāñ ke āḳhirī din the

harī-bharī sī rutoñ meñ ye Dhal bhī saktī hai
ḳhizāñ kī zard sī rañgat badal bhī saktī hai

ki barg-hā-e-ḳhizāñ dāda-jūñ uḌaa.e hue
kashāñ kashāñ liye phirtī haiñ vahshateñ apnī

juuñ barg ḳhizāñ-dīda sab zard hue ham to
garmī ne hameñ dil kī āḳhir ko jalā rakhā

koī bhī rut ho vo apnā jamāl rakhtī hai
ḳhizāñ jo aa.e to is ko bahār mat karnā

fazā-e-bāġh-e-hastī meñ ḳhizāñ bhī hai bahāreñ bhī
kahāñ ḳhushiyāñ nahīñ hotīñ kahāñ mātam nahīñ hotā

azāb-e-gard-e-ḳhizāñ bhī na ho bahār bhī aa.e
is ehtiyāt se ajr-e-vafā na māñge koī

tarīq-e-kohna pe ab nazm-e-gulistāñ na rahe
mirī bahār ko andesha-e-ḳhizāñ na rahe

havā-e-daur-e-mai-e-ḳhush-gavār raah meñ hai
ḳhizāñ chaman se hai jaatī bahār raah meñ hai

chalo chal ke pūchh aa.eñ ki ḳhizāñ kī is galī meñ
kabhī aa chukā ho shāyad koī sail-e-rañg-o-bū bhī

ho ga.ī ḳham Thoñk kar dev-e-ḳhizāñ ke sāmne
kyā kasīle haiñ javānān-e-chaman ke haath paañv

de kar chaman ko bahār-o-ḳhizāñ kā rañg
mere ḳhayāl-o-ḳhvāb pe ehsāñ kiyā gayā

ḳhizāñ kyā fasl-e-gul kahte haiñ kis ko koī mausam ho
vahī ham haiñ qafas hai aur mātam bāl-o-par kā hai

bād-e-ḳhizāñ kī mauj thī ġhuncha-e-dil ke haq meñ sam
mausam-e-gul kī bhī havā hogī na sāzgār kyā

thī mire aane se pahle har taraf chhā.ī ḳhizāñ
sahn-e-gulshan meñ bahār aa.ī mire aane ke ba.ad

fasl-e-ḳhizāñ meñ shāḳh se pattā nikāl de
sūkhe shajar se khīñch ke saaya nikāl de

ḳhizāñ ke saiñkaḌoñ manzar haiñ ai fareb-e-ḳhayāl
tulū-e-sub.h-e-bahārāñ kā e'tibār na kar

pāmāl-e-ḳhizāñ hone ko haiñ mast bahāreñ
hai sair-e-gul-o-husn-e-gulistāñ koī din aur