Tags-Khizan

naḳhl-e-anā meñ zor-e-numū kis ġhazab kā thā
ye peḌ to ḳhizāñ meñ bhī shādāb rah gayā

ḳhizāñ-rasīda hai gulshan ye qalb-e-muztar kā
kahīñ ujaḌ hī na jaa.e ḳhushī kī bārish ho

khileñge phuul yaqīnan ḳhizāñ meñ chāhat ke
jo shāḳh-e-dil pe sanam aap kī navāzish ho

isī umiid pe ham din ḳhizāñ ke kāTte haiñ
kabhī to bād-e-bahār aa.egī chaman kī taraf

huuñ zard ġham-e-tāza-nihālān-e-chaman se
us bāġh-e-ḳhizāñ-dīda meñ maiñ barg-e-ḳhizāñ huuñ

tū bahāroñ kī jā tū libās-e-shajar maiñ ḳhizāñ kī sadā maiñ ġhubār-e-safar
tū numūd-e-matar maiñ hadīs-e-digar tū samundar hai maiñ sāhiloñ kī havā

sunā hai vaqt kabhī ek sā nahīñ rahtā
qayām fasl-e-ḳhizāñ kā bhī aarzī hogā

jab tum ho mere paas ḳhizāñ bhī bahār hai
tum hī nahīñ to kaise lage dil bahār meñ

kyā ḳhizāñ meñ āb-o-rañg-e-bāġh favvāroñ se ho
sab zar-e-gul luT chukā ḳhālī ḳhazāna ho chukā

ab ḳhizāñ hai mausam-e-gul kā zamāna ho chukā
ho chukī gul-bāñg bulbul kā tarāna ho chukā

ye shab-e-ḳhizāñ
hai mire gumāñ se ajīb-tar

udaas rut hai abhī tak mire ta.āqub meñ
ḳhizāñ ke phuul khile haiñ bahār se bāhar

kunj-e-gul kī ḳhabar darīche ko
ab to bād-e-ḳhizāñ se miltī hai

us ke lab-ḳhand meñ Dhal jaa.e ḳhizāñ kā mausam
us ko gulnār kareñ zaḳhm dikhā kar apnā

kyā roz-e-bad meñ saath rahe koī ham-nashīñ
patte bhī bhāgte haiñ ḳhizāñ meñ shajar se duur

ḳhizāñ kī vādi-e-ġhurbat guzār leñ to 'shamīm'
mileñ dayār-e-bahārāñ ke kaj-kulāhoñ se

ham to ik umr se haiñ muntazir-e-marg-e-ḳhizāñ
ab ke logoñ meñ agar zikr-e-bahārāñ hai to kyā

aur kuchh roz ruke sust lahū kā mausam
aur kuchh der yahī rañg-e-ḳhizāñ rah jaa.e

kahtī hai bhar ke dam-e-sard ḳhizāñ meñ bulbul
DhūñDhtī haiñ tujhe ai fasl-e-bahārī āñkheñ

sochoñ ko tar-o-tāza rakkhā 'shabnam' tire paiham ashkoñ ne
hairat hai ki ahd-e-ḳhizāñ meñ bhī ye phuul nahīñ kumhlā.e haiñ