Tags-Khizan

koī din hai bahār-e-gul phir āḳhir hai ḳhizāñ bilkul
chaman hai manzil-e-ibrat kabhī yuuñ hai kabhī vuuñ hai

kyā jaane kab vo sub.h-e-bahārāñ ho jalva-gar
daur-e-ḳhizāñ meñ jis se bahalte rahe haiñ ham

dil kā har ek daaġh charāġhāñ se kam nahīñ
merī ḳhizāñ bhī fasl-e-bahārāñ se kam nahīñ

ik phuul mere paas thā ik sham.a mere saath thī
bāhar ḳhizāñ kā zor thā andar añdherī raat thī

karo ai ham-safīro ehtimām-e-jashn-e-āzādī
ḳhizāñ ruḳhsat huī lo jhuum kar abr-e-bahār aayā

koī shāḳh-e-girya lipaT ga.ī mire sūkhte hue jism se
maiñ ḳhizāñ kī rut meñ harā huā ye ''darūd'' hī meñ kamāl thā

hai ḳhizāñ kī dhuul kī tan par taheñ
ham rahe to nau-bahāroñ meñ rahe

ḳhizāñ ke ḳhauf se sahme parindo lauT bhī aao
tumheñ phir lahlahātī Tahniyāñ āvāz detī haiñ

tirī nigāh ke jab ahl-e-dil pe vaar chale
ḳhizāñ-nasīb chaman jānib-e-bahār chale

chhāte chhāte chhā ga.ī fasl-e-bahārāñ par ḳhizāñ
dekhte hī dekhte pāmāl gulshan ho gayā

chhūtī hai zarā jab tan ko havā chubhte haiñ ragoñ meñ kāñTe se
sau baar ḳhizāñ aa.ī hogī mahsūs magar is baar huī

phīkī phīkī bahār guzrī hai
rañg apnā ḳhizāñ meñ thā hī nahīñ

āshiq hī jab nahīñ to ḳhizāñ hai bahār-e-husn
bulbul ke saath saath ga.ī ābrū-e-gul

ḳhizāñ meñ bhī bahār-e-jāvedāñ mālūm hotī hai
javānī ho to phir har shai javāñ mālūm hotī hai

ḳhizāñ kā zikr to merī zabāñ pe thā hī nahīñ
bahār kartī hai mātam tire havāle se

gulzār meñ vo rut bhī kabhī aa ke rahegī
jab koī kalī jaur ḳhizāñ ke na sahegī

'rind' jab be-samtiyoñ meñ ḳhushk patte uḌ rahe hoñ
tohmateñ kis ke liye shām-e-ḳhizāñ sar par uThā.e

ajab be-faiz thī ye bhī mohabbat
bahāroñ meñ ḳhizāñ kā ruup sā thā

ḳhizāñ-rasīda chaman aag ho ga.e 'jazbī'
hamāre dīda-e-pur-ḳhūñ meñ thī magar kuchh baat