Tags-Khizan

daur-e-ḳhizāñ se ab to bahlā rahā huuñ dil ko
kāñToñ meñ phañs gayā huuñ phūloñ kī dostī meñ

ḳhizāñ kī rut hai janam-din hai aur dhuāñ aur phuul
havā bikher ga.ī mom-battiyāñ aur phuul

uḌā kar le ga.ī bād-e-ḳhizāñ is saal us ko bhī
rahā thā ek barg-e-zard baaqī mere gulshan meñ

az bas-ki huā haigā guzar fasl-e-ḳhizāñ kā
raunaq nahīñ rakhtā hai gulistān buḌhāpā

chaman meñ dekhiye ab ke havā kidhar kī chale
ḳhizāñ-nasīboñ ne phir āshiyāñ banā.e haiñ

ḳhizāñ kī zad pe thā dushman kī bhī nigāh meñ thā
vo sāya-dār shajar jo hamārī raah meñ thā

jab hijr ke shahr meñ dhuup utrī maiñ jaag paḌā to ḳhvāb huā
mirī soch ḳhizāñ kī shāḳh banī tirā chehra aur gulāb huā

fasl-e-ḳhizāñ to sah lī lekin mausam-e-gul meñ TuuT girī
bojh phaloñ kā sah nahīñ paa.ī shāḳh ki thī kamzor bahut

kushtagān-e-sitam-e-daur-e-ḳhizāñ haiñ ham log
apne hamrāh bahāroñ kā payambar laanā

thakī thakī sī nazar ko kahāñ mayassar tum
ḳhizāñ ke daur meñ khiltā gulāb degā kaun

chaman ḳharāb kiyā, ho ḳhizāñ kā ḳhāna-ḳharāb
na gul rahā hai na bulbul hai bāġhbāñ tanhā

mausam-e-rañg bhī hai fasl-e-ḳhizāñ bhī taarī
dekhnā ḳhuun ke dhabbe haiñ ki hai gul-kārī

yahī anjām thā ai fasl-e-ḳhizāñ
gul o bulbul kī shanāsā.ī kā

shāḳhoñ kā rañg-rūp ḳhizāñ le ga.ī magar
andāz aaj bhī vahī arbāb-e-fan sā hai

zulf zid kar ke kisī ne jo haTā.ī hogī
rūThe jalvoñ pe ḳhizāñ aur bhī chhā.ī hogī

bahāroñ kā to zikr hī kyā karūñ maiñ
gulistān-e-dil meñ ḳhizāñ tak na pahuñchī

fasl-e-gul rañg-e-chaman daur-e-ḳhizāñ husn-e-bahār
muḳhtalif naam haiñ saaqī tire paimānoñ ke

lagā hai dil ko ab anjām-kār kā khaTkā
bahār-e-gul se bhī ik pahlū-e-ḳhizāñ niklā

nairañgi-e-bahār-o-ḳhizāñ dekhte rahe
hairat se ham tilism-e-jahāñ dekhte rahe

har gul hamārī aql pe hañstā rahā magar
ham fasl-e-gul meñ rañg-e-ḳhizāñ dekhte rahe