Tags-Khoon

na ḳhūn-e-dil hai na mai kā ḳhumār āñkhoñ meñ
basī huī hai tumhārī bahār āñkhoñ meñ

mizha-e-ḳhūn-e-dil ālūda pa ye hai qatra-e-ashk
yuuñ hai jyuuñ shāḳh ho marjāñ kī guhar se paivand

yak qatra ḳhuun ho ke palak se Tapak paḌā
qissa ye kuchh huā dil ġhufrāñ-panāh kā

is fart-e-ġham meñ ḳhuun ke aañsū Tapak paḌe
ab dil bhī rāzdār hamārā nahīñ rahā

ye buuñd ḳhuun kī lauh-e-kitāb-e-ruḳh ke liye
ye til sar-e-lab-o-ruḳhsār dharne aa.e haiñ

us samt abhī ḳhuun ke pyāse haiñ hazāroñ
is samt bas ik qatra-e-ḳhūñ aur bachā hai

ḳhūn-e-jigar se likhtā huuñ 'sāġhar' maiñ harf-e-haq
vaqt aa.e to qalam ko bhī talvār dekhnā

maze jahān ke apnī nazar meñ ḳhaak nahīñ
sivā.e ḳhūn-e-jigar so jigar meñ ḳhaak nahīñ

jo chāhte haiñ chaman ko bāTeñ vo kaise bāTeñge fasl-e-gulshan
bahegā ġhunchoñ kā ḳhuun kitnā unheñ to is kā bhī Dar nahīñ hai

ye chhīñTeñ ḳhuun kī kaafī haiñ mere baḳhshavāne ko
nazar aatī hai jannat vus.at-e-dāmān-e-qātil meñ

ye ḳhuun meñ Duube hue ma.asūm farishte
ḳhāmosh larazte hue hoñToñ kī duā huuñ

haa.e 'bāsit' ye mire ḳhūn-e-tamannā kā asar
aur bhī rañgīn kuchh dāmān-e-qātil ho gayā

insāniyat ke ḳhuun kī arzāniyāñ to dekh
is kī āsmān vaale kī be-dādiyāñ to dekh

qātiloñ ne jism merā reza reza kar diyā
ḳhuun bikhrā rañg ban kar vādiyāñ chamkā gayā

chhoḌo bhī ye jañg kī bāteñ
ḳhūn-ḳharābe kī ye ghāteñ

hamāre ḳhuun se bhī us kī ḳhushbueñ phūTīñ
hameñ to qatl bhī kar ke vo bevafā na lagā

kahāñ se lā.ūñgā ḳhūn-e-jigar un ke khilāne ko
hazāroñ tarah ke ġham dil ke mehmāñ hote jaate haiñ

shajar vo bhī jise sīñchā ho apnā ḳhuun de de kar
kabhī us kī bhī chhāñv ajnabī mahsūs hotī hai

jo qatra qatra ikaTThā huā thā āñkhoñ meñ
vo ḳhuun ab mirī palkoñ pe aanā chāhtā hai

tahārat-e-zāhirī se hāsil na ho sakegī safā-e-bātin
bahā ke ham ḳhūn-e-tauba 'vahshat' usī se ik din vuzū kareñge