Tags-Khuda

ḳhudā ne rakh diyā mujh ko usī ke dil meñ jaane kyuuñ
na bāhoñ meñ huuñ maiñ jis kī na peshānī meñ huuñ yaaro

ajab āshob diyā mere ḳhudā ne mujh ko
ik tamannā-e-masīhā.ī meñ martā jā.ūñ

muhtāj nahīñ qāfila āvāz-e-darā kā
sīdhī hai rah-e-but-kada ehsān ḳhudā kā

qadāmat-pasandoñ pe kyuuñ hañs rahe ho ḳhudā kī qadāmat-pasandī to dekho
hazāroñ nahīñ balki lākhoñ baras se vahī kahkashāñ hai vahī chāñd taare

havā meñ jab uḌā parda to ik bijlī sī kaundī thī
ḳhudā jaane tumhārā partav-e-ruḳhsār thā kyā thā

baat kartā hai sahīfoñ meñ koī aur 'sa.īd'
pesh aatā hai koī aur ḳhudā mere saath

'dāġh' ko kaun dene vaalā thā
jo diyā ai ḳhudā diyā tū ne

ra.ūnatoñ meñ na itnī bhī intihā ho jaa.e
ki aadmī na rahe aadmī ḳhudā ho jaa.e

hai shujā.at va saḳhā hilm-o-hayā 'qāsim-alī'
shaan meñ sher-e-ḳhudā ke haiñ ḳhatam chāroñ ek

va.ada nahīñ payām nahīñ guftugū nahīñ
hairat hai ai ḳhudā mujhe kyuuñ intizār hai

abhī to ik qatra hī girā thā ki jis se halchal meñ hai zamāna
ḳhudā hī jaane ki kitnī quvvat dil-e-hazīñ ke gudāz meñ hai

koī ḳhabar nahīñ kis vaqt aur kahāñ gir jaa.e
ḳhudā ke haath se jām-e-sifāl duniyā kā

ḳhalā meñ tair rahā hai savāl duniyā kā
ḳhudā ko aa.egā kis din ḳhayāl duniyā kā

tum to kahte the ḳhudā tum se ḳhafā hai 'qaisar'
Dūbte vaqt vo jo ik haath baḌhā thā kyā thā

ġhair ke ḳhātir dharā jaatā huuñ maiñ muft-e-ḳhudā
koī mulzim ho vo but detā mujhī ko dos hai

jis ke ba.ad aur na rah jaa.e tamannā koī
māñgnā ho jo ḳhudā se vo tamannā māñgo

dil-e-bīnā bhī kar ḳhudā se talab
aañkh kā nuur dil kā nuur nahīñ

aa ke bazm-e-hastī meñ kyā batā.eñ kyā paayā
ham ko thā hī kyā lenā but mile ḳhudā paayā

jo bhī de de vo karam se vahī le le 'nādir'
muñh se māñgo to ḳhudā aur ḳhafā hotā hai

kabhī ḳhud ko chhūkar nahīñ dekhtā huuñ
ḳhudā jaane bas vahm meñ mubtalā huuñ