Tags-Khuda

rāhzan aadmī rahnumā aadmī
bār-hā ban chukā hai ḳhudā aadmī

va-lek dekh sake kaun bhar nazar us ko
ḳhudā ke nūr-e-jalālī se sab ko Dar aave

bhalā kyuuñ ho tujhe merī zarūrat
ki tū saare zamāne kā ḳhudā hai

safīne vaalo chalo aaj dil kī baat kaheñ
uTho ḳhudā ke liye nāḳhudā ḳhudā to nahīñ

mohabbatoñ ko na lag jaa.e nafratoñ kī nazar
ḳhudā kare ki har ik dukh sahār jā.ūñ maiñ

vo chup lagī hai ki hañstā hai aur na rotā hai
ye ho gayā hai ḳhudā jaane dil ko raat se kyā

ḳhudā aalam hai mazmūn-e-ḳhayālī haiñ tasavvur meñ
na mujh ko kuchh ta.alluq hai na merī us ko parvā hai

sune murda to jī uTThe badan meñ ruuh phir aa.e
gale meñ ai sanam nām-e-ḳhudā kyā taan palTā hai

butān-e-hind meñ nām-e-ḳhudā kab koī tujh sā hai
tirī zulfeñ haiñ kaalī ai sanam tū aap durgā hai

ye hindostān hai yaañ parbatoñ kā roz melā hai
ḳhudā jaane vo but ai 'mehr' debī hai ki durgā hai

butoñ kā zikr karo vaa.iz ḳhudā ko kis ne dekhā hai
sharār-e-sañg-e-mūsā ke liye barq-e-tajallā hai

ḳhudā jaane kiyā kis but ne kāfir ik musalmāñ ko
janev hai gale meñ 'mehr' ke māthe pe Tiikā hai

mahdūd hai shāhoñ kī gadāoñ pe navāzish
bandoñ pe ye in.ām-e-ḳhudā aur hī kuchh hai

koī darvesh-e-ḳhudā-mast abhī shahr meñ hai
naqsh baaqī hai abhī dasht kī vīrānī kā

musallam murġh-e-dil hai mehmān-e-ġham
kare jald ai ḳhudā vo ye ġhizā chaT

vahī farsh-o-arsh-nashīñ rahe hue naam alag jo kahīñ rahe
ga.e dair meñ to sanam bane ga.e lā-makāñ to ḳhudā hue

mujhī se pūchh rahā thā mirā patā koī
butoñ ke shahr meñ maujūd thā ḳhudā koī

is qadar qaht-e-basīrat bhī nahīñ ai vaa.iz
ham butoñ ke liye nikleñ to ḳhudā bhī na mile

vo rū-ba-rū hoñ to ye kaif-e-iztirāb na ho
ḳhudā kare nigah-e-shauq kāmyāb na ho