Tags-Khuda

tujh ko dekhā na tire nāz-o-adā ko dekhā
terī har tarz meñ ik shān-e-ḳhudā ko dekhā

phūñkā hai kis ne gosh-e-mohabbat meñ ai ḳhudā
afsūn-e-intizār tamannā kaheñ jise

sau ḳhauf zamāne ke simaT aa.e haiñ dil meñ
bas ek ḳhudā-pāk kā Dar hī nahīñ aayā

but-e-kāfir jo tū mujh se ḳhafā ho
nahīñ kuchh ḳhauf merā bhī ḳhudā hai

yā-ḳhudā ḳhair ki ham donoñ anā vaale haiñ
vo bulāne kā nahīñ aur maiñ jaane kā nahīñ

ta.alluq tum se jo bhī hai nahīñ ma.alūm kal kyā ho
chalo ye faisla apnā ḳhudā par chhoḌ dete haiñ

dekheñ mahshar meñ un se kyā Thahre
the vahī but vahī ḳhudā Thahre

hai farz buujh avval apnā pichhe ḳhudā ko
be-būjh bandagī hai sab rañj aur malāmat

bin piir ke ḳhudā ko paayā na koī hargiz
kāmil ko kyuuñ pacchāne be-sidq o be-hidāyat

'majāzī' se 'jigar' kah do are o aql ke dushman
muqir ho yā koī munkir ḳhudā yuuñ bhī hai aur yuuñ bhī

ḳhudā rakhe use dil-shād 'sāhir'
ki us ne ham ko taḌpāyā bahut hai

maḳhlūq ḳhudā kī ban ke sipar maidāñ meñ dilāvar ek tū hī
īmāñ ke payambar aa.e bahut insāñ kā payambar ek tū hī

un raqīboñ ko ḳhudā ġhārat kare
aap hoñ ye āshiq-e-nāshād ho

zāhir-o-bātin meñ ai dil farq ho
but baġhal meñ ho ḳhudā kī yaad ho

yuuñ to ham ājiz-tarīn-e-ḳhalq-e-ālam haiñ vale
dekhiyo qudrat ḳhudā kī gar hameñ qudrat huī

is tarah kartā huuñ puujā terī
tū mohabbat kā ḳhudā ho jaise

ek bāġh-e-ta.alluq kisī chashm-e-hairāñ meñ ābād hai
ai ḳhudā is nazāre ko sarsabz rakhnā sadā ke liye

be-sadā sā.atoñ meñ samā.at kī raftār rukne ko thī
ek aahaT ne mujh se kahā jaag jaao ḳhudā ke liye

kaisī chalī hai ab ke havā tere shahr meñ
bande bhī ho ga.e haiñ ḳhudā tere shahr meñ

vo ruuh meñ anvār-e-ḳhudā sub.h vo sādiq
vo husn jise dekh ke har aañkh ho āshiq