Tags-Khuda

ham faqīroñ ko sahāre kī zarūrat kyā hai
be sahāroñ kā sahārā to ḳhudā hotā hai

ātish-e-batn meñ gal jaate haiñ ḳhud-kām shuyūḳh
sāhab-e-dard parastār-e-ḳhudā hotā hai

āsmānī balā.eñ nāzil kar
ai ḳhudā dil meñ terā Dar jaage

bhalā ho pīr-e-muġhāñ kā idhar nigāh mile
faqīr haiñ koī chullū ḳhudā kī raah mile

javānī aur yuuñ ghir jaa.e tūfān-e-havādis meñ
ḳhudā rakkhe abhī to be-ḳhudī kā daur hai saaqī

hai ḳhudā gavāh tire binā mirī zindagī to na kaT sakī
mujhe ye batā ki mire binā tirī umr kaise guzar ga.ī

rabb-e-izzat ke liye bhī koī rahne do ḳhitāb
tum ḳhudāvand hī kahlāo ḳhudā aur sahī

ḳhauf ġhammāz adālat kā ḳhatar daar kā Dar
haiñ jahāñ itne vahāñ ḳhauf-e-ḳhudā aur sahī

'mashriqī' chhoḌiye butoñ kā zikr
sub.h uTh kar ḳhudā ḳhudā kahiye

ḳhizāñ meñ ahl-e-nasheman kā haal to dekhā
qafas nasīb pe kyā guzrī hai ḳhudā jaane

chaman ko lag ga.ī kis kī nazar ḳhudā jaane
chaman rahā na rahe vo chaman ke afsāne

dekh 'nassāḳh' gar na hotā kufr
kahte be-shubah ham ḳhudā hai ishq

khulī jo aañkh mirī sāmnā qazā se huā
jo aañkh band huī sābiqa ḳhudā se huā

ḳhumār-e-husn salāmat rakhe ḳhudā us kā
jahāñ vo chāhe vahāñ mai-kadā banā degā

bāñdhe hue haiñ vaqt sabhī us ke hukm meñ
hai jis ḳhudā ke haath meñ kār-e-nizām-e-shām

maiñ sāda-lauhī pe apnī huuñ mutma.in yaaro
ḳhudā ke vāste samjhe na koī daanā mujhe

ḳhudā kā shukr hai ai 'shauq' ab bhī zinda huuñ
satā rahā hai zamāne se ye zamāna mujhe

kabhī sharābī kabhī namāzī kabhī huuñ maiñ rind-gāh zāhid
ḳhudā kā Dar hai butoñ kā khaTkā ajab tarah ke azaab meñ huuñ

namāz kaisī kahāñ kā roza abhī maiñ shaġhl-e-sharāb meñ huuñ
ḳhudā kī yaad aa.e kis tarah se butoñ ke qahr-o-itāb meñ huuñ

tan-āsānī kahāñ taqdīr meñ ham dil-giraftoñ kī
ḳhudā par ḳhuub raushan hai ki jis mushkil meñ rahte haiñ