Tags-Khuda

ḳhudā rakkhe mohabbat ne kiye ābād donoñ ghar
maiñ un ke dil meñ rahtā huuñ vo mere dil meñ rahte haiñ

ḳhudā rakkhe salāmat jin ko un ko maut kab aa.e
taḌapte loTte ham kūcha-e-qātil meñ rahte haiñ

ḳhudā rakkhe dil-e-īzā-talab ko
zabāñ chaltī rahegī nashtaroñ kī

alag alag se ufuq par haiñ chhoTe chhoTe ġhubār
ye kārvāñ ko mire kyā huā ḳhudā jaane

na kar kisī pe bharosa ki kashtiyāñ Dūbeñ
ḳhudā ke hote hue nāḳhudā ke hote hue

na chāhne pe bhī tujh ko ḳhudā se maañg liyā
ye haal hai dil-e-be-mudda.ā ke hote hue

but ulajhte haiñ roz mujh se 'riyāz'
roz mujh bā-ḳhudā se hotī hai

nayā nayā hai abhī jazba-e-ḳhud-ārā.ī
ḳhudā kare ki na aa.e ḳhayāl-e-yaktā.ī

zid hamārī duā se hotī hai
ham se kyā ab ḳhudā se hotī hai

nā-ḳhudā ne mujhe daldal meñ phañsā.e rakkhā
Duub marne na diyā paar utarne na diyā

dayār-e-dil to huā vaqf-e-āhuvān-e-javāñ
ab aur koī banā.eñge ghar ḳhudā ke liye

ik ġhazal kyā sunā dī mahfil meñ
bā-ḳhudā rah ga.e sabhī hil ke

ai ḳhudā ai lam-yazal
har nazar meñ ḳhvāb rakh

maiñ shāh-kār huuñ terā to ai ḳhudā ik din
ye muzhda aa ke mire rū-ba-rū zabānī de

hai tañg merī nazar meñ ye kā.enāt terī
mire ḳhudā mujhe idrāk-e-lā-makānī de

milā diye ḳhaak meñ ḳhudā ne palak ke lagte hī shaah lākhoñ
jinhoñ ke adnā ġhulām rakhte the apne chākar sipāh lākhoñ

namāz o roze zakāt o haj par nahīñ hai mauqūf kuchh ai zāhid
jidhar ko jaave udhar ko haiñge ḳhudā ke milne ke raah lākhoñ

ai ḳhudā ret ke sahrā ko samundar kar de
yā chhalaktī huī āñkhoñ ko bhī patthar kar de

kiyā hai kyuuñ 'bahr' se kinārā tirī judā.ī ne mujh ko maarā
are but-e-sañg-dil ḳhudā-rā bulā le mujh ko bhī to jahāñ hai

ḳhudā na dikhlā.e achchhī sūrat abhī to aa jaatī hai harārat
paḌegī be-shak nigāh-e-ulfat za.iif go maiñ huuñ dil javāñ hai