Tags-Khudi

taskīn-e-dil ko rāz-e-ḳhudī pūchhtā hai kyā
kahne ko kah duuñ aur agar ulTā asar huā

vo havāoñ hī se baras paḌe vo tirī nigah se chhalak uThe
koī be-ḳhudī na hameñ milī ki jo be-niyāz-e-subū milī

ḳhudī ke māthe pe dāġh-e-sajda havas ke chehre pe tīrgī hai
maiñ ek ā.īna le ke donoñ ko duur hī se dikhā rahā huuñ

tamannā aur phir un kī tamannā
ye irfān-e-ḳhudī kī intihā hai

gulshan meñ rut na.ī hai
har samt be-ḳhudī hai

maiñ aur ye be-niyāzī-e-shauq
ehsān hai josh-e-be-ḳhudī kā

be-ḳhudī meñ rāz-e-dil kah Dālte haiñ be-jhijak
piine vāloñ ko nashe meñ pārsā paate haiñ log

pī thī 'bedam' azal meñ kaisī sharāb
aaj tak be-ḳhudī nahīñ jaatī

us ke hote ḳhudī se paak huuñ maiñ
ḳhuub hai be-ḳhudī nahīñ jaatī

kyā tamāshā hai jo kal raat vo laa.e tashrīf
be-ḳhudī ne ye liyā aan ke yakbār ki bas

na jaane kaT gayā kis be-ḳhudī ke aalam meñ
vo ek lamha guzarte jise zamāna lage

be-ḳhudī ye dam-e-ruḳhsat thī ki sab kuchh bhūlā
un kī bāteñ bhī mujhe yaad rahīñ thoḌī sī

tiflī ne be-ḳhudī kā āġhāz kiyā
quvvat pe shabāb ne baḌā naaz kiyā

tū gar sāmne ho to maiñ be-ḳhudī meñ
sitāroñ ko sajde pe majbūr kar duuñ

be-ḳhudī meñ ajab mazā dekhā
sirr-e-maḳhfī ko barmalā dekhā

sāġhar-e-be-ḳhudī se ho sarshār
ham ne har shai meñ ab ḳhudā dekhā

har dil meñ jalva-rez hai phir jazba-e-ḳhudī
anqā hai etibār-e-mulūkāna āj-kal

kyā zarūrat raushnī kī be-ḳhudī kī bazm meñ
zulf-e-sāqī mauj-e-mai sāġhar dhuāñ battī charāġh

aaj is bazm meñ aa.e ho baḌī dhuum ke saath
be-ḳhudī mahv-e-nazāra hai tumhārī ḳhātir

kārobār-e-jahāñ sañvarte haiñ
hosh jab be-ḳhudī se miltā hai