Tags-Khudi

dil-parastī ḳhudā-parastī hai
ḳhud-parastī ḳhudī nahīñ hotī

vo jo tūfān-e-ḳhudī le ke baḌā hai 'ābid'
us ko mālūm nahīñ koh-e-anā huuñ maiñ bhī

pās-e-ādāb-e-vafā thā ki shikasta-pā.ī
be-ḳhudī meñ bhī na ham had se guzarne paa.e

sar pā-e-ḳhum pe chāhiye hañgām-e-be-ḳhudī
rū sū-e-qibla vaqt-e-munājāt chāhiye

mai se ġharaz nashāt hai kis rū-siyāh ko
ik-gūna be-ḳhudī mujhe din raat chāhiye

jo be-ḳhudī hai salāmat to mil hī jā.egā
barā-e-fursat-e-andesha yaar kā zaanū

kahāñ tak ai vā.izo ye jhagḌe maze uThāne do be-ḳhudī ke
jo hosh meñ huuñ to maiñ ye samjhūñ harām kyā hai halāl kyā hai

maiñ apne aap meñ jhāñkā to ye sadā aa.ī
ḳhudī se kuchh na milā aur anā se kuchh na milā

ḳhudī ko aa ga.ī hañsī umiid ke savāl par
añdhere tilmilā uThe charāġh kī majāl par

yahī to kufr hai yārān-e-be-ḳhudī ke huzūr
jo kufr-o-dīñ kā mire yaar imtiyāz rahā

ḳhudī kī raushnī meñ maiñ ne dekhā hai aqīdat ko
ḳhudā.ī varna aazar kī mirī Thokar pe rakkhī thī

juz be-ḳhudī guzar nahīñ kū-e-habīb meñ
gum ho gayā jo maiñ to milā rāsta mujhe

sarshār-e-be-ḳhudī the 'asar' bazm-e-yār meñ
kyā jāneñ ham raqīb kahāñ thā kahāñ na thā

mast āñkhoñ hī se pilā saaqī
jaam se be-ḳhudī nahīñ hotī

be-ḳhudī aur baḌh ga.ī dil kī
jaane kyā yaad aa gayā hogā

kisī pe dil kā thā aanā ki be-ḳhudī chhā.ī
samand-e-hosh ko aafat hai tāziyāna-e-ishq

parda paḌā huā thā ḳhudī ne uThā diyā
apnī hī ma.arifat ne tumhārā pata diyā

shuhūd kī jo sat.h pe anāniyat kā shor uThā
to dāman-e-ḳhudī ko tār-tār kar liyā gayā

badlā huā hai rañg jahāñ mai-kashī ke ba.ad
ḳhud se lagāv hone lagā be-ḳhudī ke ba.ad

hai ḳhudī aur be-ḳhudī kuchh aur
be-ḳhudī kā maza ḳhudī meñ nahīñ