Tags-Khudi

tire saath hai tire paas hai na judā samajh vo judā nahīñ
ye ḳhudī kā parda uThā ke dekh agar haañ ḳhudā kī talāsh hai

mujhe justujū hai junūn kī mujhe be-ḳhudī kī hai aarzū
mire kārvān-e-hayāt ko kisī rahnumā kī talāsh hai

barham-zan-e-hijāb hai ḳhud-raftagi-e-husn
ik shān-e-be-ḳhudī hai zuleḳhā kaheñ jise

ḳhudī meñ Dūbte haiñ phir ubhar bhī aate haiñ
magar ye hausla-e-mard-e-hech-kāra nahīñ

ḳhudī vo bahr hai jis kā koī kināra nahīñ
tū aabjū ise samjhā agar to chāra nahīñ

shakl tasvīr-e-be-ḳhudī kab tak
kaso din aap meñ bhī ā.iyegā

jalva hai be-ḳhudī-talab ishq hai himmat-āzmā
dīda-e-mast yaar se aañkh milā ke bhuul jā

na mohtasib kī ḳhushāmad na mai-kade kā tavāf
ḳhudī meñ mast huuñ apnī bahār meñ gum huuñ

harīm-e-nāz ko sūrat-parast kyā jaane
adā-shanās faqat dil kī be-ḳhudī hogī

be-ḳhudī hashr meñ kyā yaad dilā.ūñgā use
ḳhud mujhe yaad ab us shoḳh kā va.ada bhī nahīñ

us maqām-e-ishq meñ huuñ marhabā ai be-ḳhudī
zarra zarra hai jahāñ garm-e-safar mere liye

ḳhudī jaagī uThe parde ujāgar ho ga.iiñ rāheñ
nazar kotāh thī tārīk thā saarā jahāñ pahle

jis pe merī justujū ne Daal rakkhe the hijāb
be-ḳhudī ne ab use mahsūs o uryāñ kar diyā

haañ kaif-e-be-ḳhudī kī vo saa.at bhī yaad hai
mahsūs kar rahā thā ḳhudā ho gayā huuñ maiñ

jis rāste se le ga.ī thī mujh ko be-ḳhudī
us raah meñ kisī ke qadam ke nishāñ na the

ġhalat hai dil pe qabza kyā karegī be-ḳhudī merī
ye jins-e-mushtarak hai jo kabhī un kī kabhī merī

hijāb uThte chale jaate haiñ aur maiñ baḌhtā jaatā huuñ
kahāñ tak mujh ko le jaatī hai dekhūñ be-ḳhudī merī

'shabāb' is be-ḳhudī meñ mashġhala hai bas yahī baaqī
miyān-e-kūcha-e-dildār uThnā baiThnā chalnā

ye be-ḳhudī meñ sambhalnā to sahl hai 'aḳhtar'
hamārī raah koī pārsā chale to gire

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ