Tags-Khudi

hai bair ḳhudā.ī aur ḳhudī meñ
itnī bhī ḳhudī na kar ḳhudā se

har taraf be-ḳhudī o be-ḳhabarī kī hai numūd
qābil-e-dīd hai duniyā tire hairānoñ kī

mohabbat nek-o-bad ko sochne de ġhair-mumkin hai
baḌhī jab be-ḳhudī phir kaun Dartā hai gunāhoñ se

agar honā paḌe mannat-kash-e-amvāj bhī mujh ko
tū phir merī ḳhudī ko kuchh ġham-e-sāhil nahīñ hotā

ai mirī begam na tū merī ḳhudī kamzor kar
ye sharīfoñ kā mohalla hai na itnā shor kar

is meñ hamārī apnī ḳhudī kā savāl thā
ehsāñ nahīñ kiyā hai jo vaada vafā kiyā

'bedam'-e-ḳhasta hai kahāñ asl meñ koī aur hai
zamzama-sanj be-ḳhudī naġhma-tarāz sāz-e-ishq

korā hai ye hāshiya ḳhudī kā
hastī kā vo baab aa rahā hai

ai be-ḳhudī jo aap meñ ham ab kī ā.eñge
phir dil-lagī se bhī nahīñ dil ko lagā.eñge

ā.eñge vo to aap meñ hargiz na ā.eñge
ham apnī be-ḳhudī ke tamāshe dikhā.eñge

ruuh ko chamkā ḳhudī ko toḌ kar ziine banā
do ye tadbīreñ haiñ duniyā meñ ubharne ke liye

yaañ jo dil-e-raushan ki vo ḳhālī hai ḳhudī se
pahuñchā.ī falak ne use mahtāb kī mīrās

na huā ilāj-e-ġham-e-ḳhudī kisī barahman se na shaiḳh se
mujhe is balā se bachāne ko jo uThā to pīr-e-muġhāñ uThā

Daalā hai be-ḳhudī ne ajab raah par mujhe
āñkheñ haiñ aur kuchh nahīñ aatā nazar mujhe

apnī ḳhudī kī dhun meñ mansūr ho gayā huuñ
ḳhud ban gayā huuñ jalva ḳhud tuur ho gayā huuñ

ḳhudī pasand anāsir hayāt ki ḳhātir
jo ehtijāj na karte to aur kyā karte

milī hai auj ḳhudī ko yaqīn-e-mohkam se
sunā hai marzī-e-dāvar mirī talāsh meñ hai

na iḳhtilāf-e-mazāhib ke phir paḌeñ jhagḌe
hijāb apnī ḳhudī kā agar na haa.il ho

mai-kada thā chāñdnī thī maiñ na thā
ik mujassam be-ḳhudī thī maiñ na thā

dekh to pī kar zarā sī aaj sahbā-e-ḳhudī
dekh bantā hai jahāñ ik ā.ina-ḳhāna abhī