Tags-Khushi

aadat se un kī dil ko ḳhushī bhī hai ġham bhī hai
ye lutf hai sitam bhī hai uzr-e-sitam bhī hai

na ḳhushī de to kuchh dilāsa de
dost jaise ho mujh ko bahlā de

qismat meñ ḳhushī jitnī thī huī aur ġham bhī hai jitnā honā hai
ghar phūñk tamāshā dekh chuke ab jañgal jañgal ronā hai

jo ranj-o-ġham meñ mire saath saath thā ab tak
use bhī merī ḳhushī se malāl hone lagā

giraftārī kī lazzat aur nirā āzād kyā jaane
ḳhushī se kāTnā ġham kā dil-e-nāshād kyā jaane

iltifāt o sargirānī par ḳhushī kyā ranj kyā
kuchh bahāna is se baḌh kar dīda-e-tar chāhiye

apnī hañsī ko haal kā paimāna kījiye
jitnī ḳhushī hai naap ke utnī batā.egī

mile haiñ dukh to hameñ roz hī tire dar se
magar ye aaj dukhoñ meñ na.ī ḳhushī kyā hai

diloñ ko rañj ye kaisā hai ye ḳhushī kyā hai
ye zulmatoñ se ujāloñ kī hamdamī kyā hai

Dar chaTakne kī ḳhushī par hī bikharne kā huā
bū-e-gul phuuT ke jab ġhuncha-ba-ġhuncha niklī

kyā ḳhudā jaane mire dil ko huā tere ba.ad
na ḳhushī is meñ Thahartī hai na ġham rahtā hai

iqrār-e-vafā kiyā thā us ne
maiñ fart-e-ḳhushī se mar gayā thā

mujhe malāl meñ rakhnā ḳhushī tumhārī thī
magar maiñ ḳhush huuñ ki vābastagī tumhārī thī

maiñ kuchh isī ḳhushī meñ thā
kisī ne jhāñk kar kahā

ġham ho ki ḳhushī koī tamāshā nahīñ karte
kuchh log kisī baat kā charchā nahīñ karte

ye bahār-o-ḳhizāñ ye ḳhushī aur ġham ye hasīñ nāznīñ dil ke patthar sanam
sab sahāre haiñ bas chaar din ke liye zindagī-bhar kā koī sahārā nahīñ

dil rahā sarḳhushī se begāna
garche armāñ bahut nikalte rahe

har ḳhushī 'arsh' vaj.h-e-dard banī
farsh-e-shabnam pe paañv jalte rahe

zindagī sarḳhushī junūñ vahshat
maut ke naam kyuuñ badalte rahe

dukhoñ kā kyā hai ye aate haiñ tiir kī mānind
ḳhushī hamesha mire vāste kamān sī hai