Tags-Khushi

ḳhushī se aaj us ne baat kar lī
tabī.at ho ga.ī be-intihā ḳhush

'kañval' ḳhushī kī huā kartī hai yūñhī takmīl
ġham-e-hayāt ke har bahr-e-be-karāñ se guzar

ye kaun baaġh meñ 'sāhir' dikhā.ī dene lagā
ki phuul peḌ parinde ḳhushī manāte haiñ

kuchh zindagī meñ ishq-o-vafā kā hunar bhī rakh
rishta ḳhushī se joḌ ġham-e-mo'tabar meñ rakh

us kī ḳhushī ke vāste ḳhud ko fanā kiyā
phir bhī vo kah rahā hai vafādār ham nahīñ

ġhamoñ meñ Duubī huī hai har ik ḳhushī merī
ajiib taur se guzrī hai zindagī merī

ho kisī kī ḳhushī gar is meñ 'adam'
jurm kā irtikāb karte ho

ye hālat hai ki kuchh pā kar ḳhushī dil ko nahīñ hotī
agar kuchh kho bhī jaatā hai to us kā ġham nahīñ hotā

ḳhushī kī dāstāñ banjar zamīnoñ kī hathelī par
gulābī nuur barsāte hue bādal se likhtā huuñ

tarāna-e-ġham-e-pinhāñ hai har ḳhushī apnī
ki ek dard-e-musalsal hai zindagī apnī

tabassum lab par āñkhoñ meñ namī hai
ḳhudā jaane ye ġham hai yā ḳhushī hai

zaḳhm thoḌī sī ḳhushī de ke chale jaate haiñ
ḳhushk āñkhoñ ko namī de ke chale jaate haiñ

ek ik kar ke Tapaktī haiñ ḳhushī kī būñdeñ
kis liye phuuT ke rotā hai dhuāñ rātoñ kā

hisār-e-dard kī ūñchā.ī baḌhtī jaatī hai
ḳhushī kī āñdhiyāñ aa kar banā.eñ dar koī

ham ko agar ḳhushī hai to ye ki is jahāñ se
be-barg-o-bār guzre fasl-e-fuzūl laa.e

chhupā milā mujhe ġham kī siyāh rātoñ meñ
jise maiñ DhūñD rahā huuñ ḳhushī ke chehre par

kaash hāsil ho haqīqī zindagī kā ek din
sarḳhushī kā ek lamha yā ḳhushī kā ek din

vo sarḳhushī de ki zindagī ko shabāb se bahara-yāb kar de
mire ḳhayāloñ meñ rañg bhar de mire lahū ko sharāb kar de

ye ġham nahīñ ki hamīñ ko yahāñ amaañ na milī
ḳhushī ye hai ki tirī anjuman sañvār chale

ik ḳhushī ke liye haiñ kitne ġham
mubtalā-e-sad-ārzū haiñ ham