Tags-Khushi

us ko udaas dekh ke kitnī ḳhushī huī
merī tamām umr kā ġham-āshnā to hai

ḳhushī ke vaqt meñ kyoñ ḳhaas sadme yaad aate haiñ
ki hoñToñ pe hañsī ke saath āñkhoñ meñ namī kyoñ ho

agar miliye kisī se aap to dil khol kar miliye
ḳhulūs-e-dil hī jab na ho to phir mil kar ḳhushī kyoñ ho

ḳhushī jo sāya-e-ġham meñ rahe phir vo ḳhushī kyoñ ho
grahan jo chāñd ko lag jaa.e to phir chāñdnī kyoñ ho

ḳhushī kī aarzū ko pā ke mahrūm-e-ḳhushī maiñ ne
ḳhushī kī aarzū dil meñ kabhī palne na dī maiñ ne

ye ab tujh par hai to qadmoñ meñ rahne de ki Thukrā de
tire qadmoñ meñ rakh dī apne dil kī har ḳhushī maiñ ne

samajhte haiñ ham khel duniyā ke ġham ko
hamārī ḳhushī hai tumhārī ḳhushī se

badal jaa.e gar be-qarāroñ kī duniyā
to maiñ apnī duniyā luTā duuñ ḳhushī se

hai itnā hī ab vāsta zindagī se
kī maiñ jī rahā huuñ tumhārī ḳhushī se

jis meñ tum hote ḳhushī so hī to ham karte the
par nahīñ jānte kis vāste bezār hue

ye uljhaneñ kyoñ ye dard-o-ġham kyoñ ye mushkileñ kyoñ ye Thokareñ kyoñ
milī to haiñ be-shumār chīzeñ phir in ke badle bas ik ḳhushī kyoñ

jo maut hai zindagī ke pīchhe to maut ke pīchhe zindagī kyoñ
ġhamī ke pīchhe bhī gar ḳhushī hai ḳhushī ke pīchhe hai phir ġhamī kyoñ

mohabbatoñ meñ kahāñ apne vāste fursat
jise bhī chāhe vo chāhe mirī ḳhushī dekho

ġham-e-hayāt se laḌte guzār dī maiñ ne
magar ye ġham hai tumheñ kuchh ḳhushī na de paayā

maiñ naaz kyuuñ na karūñ apne TuuTe ḳhvāboñ par
ki ḳhud-kushī bhī inhoñne ḳhushī ḳhushī kar lī

ḳhushī se maut aa.e ab mujhe marnā gavārā hai
ga.e vo jab se mujh ko zindagī achchhī nahīñ lagtī

ġham-e-jānāñ se dil mānūs jab se ho gayā mujh ko
hañsī achchhī nahīñ lagtī ḳhushī achchhī nahīñ lagtī

ḳhushī ko ham-nashīñ apnā banā kar
nishān-e-ġham bahut gahrā huā hai

ek TukḌā ḳhushī kā thā rakkhā huā
jaane kis shaḳhs ne lāpata kar diyā

ġhazab to ye hai vo aisā kah ke ḳhushī kā iz.hār kar rahe the
ki ham ne dastāreñ bech dī haiñ saroñ ko lekin bachā liyā hai